هەر جارەکا ئەز ل بەرامبەر تابلۆیەکی د ڕاوەستم، ب تنێ ڕەنگان نابینم؛ بەلکو ئەز چیرۆکەکێ، بیرهاتنەکێ، هەستەکی، و هندەک جاران خەونەکێ دبینم کو ئافرێنەرێ وێ نەشیایە ب پەیڤان دەربڕینێ ژێ بکەت.

ژ بەر ڤێ چەندێ ئەز باوەڕ دکەم کو هونەر بۆ گەنجان نە ب تنێ داهێنانەک یان ڕێکەک بۆ دەربازکرنا دەمی یە، بەلکو دشێت ببیتە زمانەکێ تەمام بۆ دەربڕینێ ژ خۆ، ژ کەلتوورێ مە، و ژ وێ جیهانا ئەم تێدا دژین.

ل ڤێرێ ئەز کەتمە هزرا پرسیارەکا سادە، بەلێ گەلەک واتایێن کویر هەڵگرتینە: هونەرێ گەنجان ل کوردستانێ دشێت چ بێژیتە جیهانێ؟

دەمێ هونەر دبیتە دەنگ

ل کوردستانێ، گەلەک گەنج مەزن دبن و ئەو چیرۆکێن گرێدای ب ناسنامە، بیرهاتن، کەلتوور، سروشت، و ئەو گۆڕانکاریێن بسەر ژیانا وان دا هاتین هەڵگرتینە. بەلێ نڤشێ نوو نە ب تنێ دڤێت ڤان چیرۆکان بپارێزیت؛ بەلکو دڤێت ب ڕێکا خۆ ئەڤان چیرۆکان دووبارە ڤەگێڕیت.

چێدبیت تابلۆ ل سەر چیایەکی بیت، بەلێ بۆ هونەرمەندی ئەو تابلۆ ڕامانا وەلاتی ددەت. یان چێدبیت ل سەر ژنەکێ بیت ب جلوبەرگێن کوردی، بەلێ د ڕاستی دا بەحسێ دایکێ و دەربڕینێ ژ ناسنامەیا مە دکەت؛ یان ژی ل سەر کۆچبەرکرنێ بیت، بەلێ پرسیارێن ل سەر خۆنیاسین، ماڵ و ئایندەی دگەل خۆ دئینیت.

ل ڤێرێ هونەر دبووریت ژ هندێ کو ب تنێ وێنەیەکێ جوان بیت؛ دبیتە دەنگ.

سێ جهـ… و ئێک دەنگ

دەما ئەز هەڤبەرکرنێ د ناڤبەرا کوردستانێ و جیهانێ دا دکەم، ئەز جوداهییەکا دیار د ئەزموونان دا دبینم:

• ل کوردستانێ: هونەر گەلەک پرسیارێن ناسنامە، بیرهاتن، کەلتوور و کوردەواریێ هەڵگرتینە.
• ل جیهانێ: هونەر کەرەستەیەکێ مەزنە ل سەر دیالۆگا د ناڤبەرا کەلتووران، نووگەری، تەکنۆلۆجیا، و دووبارە هزرکرن ل سەر مۆڕاسێ فەرهەنگی. هەروەسا گرێدایی دەربڕینا کەسایەتی، ڕەوشەنبیری، پەروەردە و پشکدارییا جێندەری یە.

سەرەڕای جوداهییا ڤان ئەزموونان، ئێک وەکهەڤی هەیە کو وان هەموویان کۆم دکەت: گەنج دڤێت ببیتە پشکەک ژ چیرۆکێ، نە ب تنێ سەحکەرەک ل سەر بیت.

پەیاما مە ژ کوردستانێ: خۆڕسکی بەرامبەر کۆپیکرنێ

ئەز باوەڕ ناکەم کو هونەرێ کوردی یێ گەنجان پێدڤی بیت ببیتە کۆپیا جهێن دی. ئەم پێدڤی نینین چاڤ ل چینێ یان ئەمریکایێ بکەین. مە چیرۆک، چیا، ڕەنگ، کەلتوور و بیرهاتنێن خۆ یێن تایبەت هەنە، و مە نڤشەکێ نوو هەیە کو ب چاڤەکێ دی سەیری ڤان هەموویان دکەت.

جیهان پێدڤی ب کۆپیکرنا مۆدێلێن بەرێ نینە؛ جیهان پێدڤی ب دەنگێن ڕاستەقینە یە:

• دەنگێ گەنجەکی ژ دهۆکێ یان هەولێرێ.
• دەنگێ هونەرمەندەکی کو دووبارە کەلتووری وێنە دکەت.
• دەنگێ هونەرمەندەکی کو بەحسێ ژینگەهێ دکەت یان خەونا ب ئاشتیێ ڤە دبینیت.
• دەنگێ هونەرمەندەکی کو ب سادەیی دبێژیت: «ئەڤە چیرۆکا منە، و ئەڤە ئەو ڕێکە ئەز جیهانێ تێدا دبینم.»

هونەر و ئایندە: ئاڤاکرنا ئیکۆسیستەمەکێ داهێنەرانە

پێنگاڤا بهێت نە ب تنێ ڕێکخستنا پێشانگەهێن زێدەترە؛ ئەم پێدڤی ب ئاڤاکرنا ژینگەهەکا تەمام و بەردەوامین بۆ هونەرمەندێن گەنج، ب ڕێکا:

• دابینکرنا سەنتەر و جهێن تایبەت یێن هونەری و پێشانگەهان.
• بەرنامەیێن مەشق، ڕاهێنان و ئاڵۆگۆڕیا کەلتووری.
• ڕەخساندنا دەرفەتێن ئابووری، پلاتفۆرمێن دیجیتاڵی، و هەڤپشکیێن نێڤدەوڵەتی.
• گرێدانا هونەری ب ژینگەهـ، گەشتوگوزار، پەروەردە، ئاشتی و تەکنۆلۆجیایێ ڤە.

چونکی هونەرمەندێ گەنج نە ب تنێ وێنەکێشە؛ چێدبیت دیزاینەر، بەرهەمهێنەرێ ناڤەرۆکێ، وێنەگر، یان خودان پڕۆژە بیت کو دشێت شیانێن داهێنانێ بۆ دروستکرنا گۆڕانکارییا ڕاستەقینە د جڤاکێ خۆ دا بکار بینیت.