«ئەگەر تە سەربازەک دیت یێ شەهید بوویی و تڤەنگا وی یا ب ڕەخ ڤە و فیشەک نەماینە، بزانە ئەو کوردە و پێشمەرگەیە.»
— مستەفا بارزانی

جەنەڕال وەک ڕێبەر و سەرکردەیەکێ هەڤچەرخ و دیار د بزاڤێن ڕزگاریخوازێن کوردی دا، گەلەک نەمابوو کونگرەیێ دەهێ ب ڕێبەڕیا جەنەڕال مەلا مستەفایی بهێتە گرێدان، بەلێ کاودان د هاریکار نەبوون و مستەفا بارزانی وەغەرا دووماهیێ دکەت. ب ئەگەرێ گیانژدەستدانا جەنەڕالی، کاودان ب تەمامی هاتنە گوهرین.

سەفەرا چارەسەریێ بۆ ویلایەتێن ئێکگرتی یێن ئەمریکایێ

پشتی مستەفا بارزانی نەساخ دبیت و تووشی نەخۆشیا شێرپەنجێ دبیت، ب مەرەما چارەسەریێ بەرەڤ واشنتۆنا پایتەختێ ویلایەتێن ئێکگرتی چوویە. بەری وەغەربکەت، جەنابێ وی ل سەر پێشنیارا نۆژداران هاتە هنارتن بۆ ژ دەرڤە ژ بەرکو چارەسەریا وی ب زەحمەت کەتبوو.

پشتی چووینە ئەمریکا، ل واشنتۆن د خانیەکێ ڤە ئاکنجی بوو. ئدریس بارزانییێ کوڕێ وی، موحسین دزەیی، برازایەکێ خۆ ب ناڤێ فەرهاد بارزانی، دگەل کەسەکێ دی ب ناڤێ مەحمود دۆسکی پێکڤە د وی خانیدا دژیان.

ل دووماهیا هەەیڤا دوو، تەندروستیا بارزانی پتر بەرەڤ باشیێ ڤە دچوو، کو هەتا وی ڕادەیی نۆژداران سۆز دا بوویێ فرێکەنە ئیرانێ ناڤ کەس و کارێن وی، کو ل وی دەمی هەمی خێزانا وی ل وێرێ دژیان. بەلێ پاشی ئدریس بارزانی دبینیت کو تەندروستیا بابێ وی یا خرابە و یا پێدڤیە د نەخۆشخانێ ڤە بهێتە نڤاندن. ژ بەر هندێ داخواز ژ بابێ خۆ دکەت و رازی دکەت ببنە نەخۆشخانا زانکۆیا جۆرج تاون.

ژ بەر کو چۆکێ وی یێ ڕاستێ گەلەک وەڕمی بوو و تووشبووی بوو ب نەخۆشیا شێرپەنجێ، نۆژداران گوتبوویێ ئەڤە دبیتە ئەگەرێ هشکبوونا دەستێ وی یێ ڕاستێ، بەلێ بارزانی گۆت: «نوکە ئەو نەشێن چ بۆ من بکەن، چارەسەریا من نینە». هەر چاوا بیت ئەو رازی بوو بچیتە وێ نەخۆشخانێ.

دەمژمێرێن دووماهیێ د نەخۆشخانێ دا (1-3-1979)

جەنەڕال ل ڕۆژا 1-3-1979 ب ئەگەرێ شێرپەنجێ دووبارە جارەکا دی دهێتە نڤاندن ل نەخۆشخانێ. دووماهی نڤستنا وی ل ژوورەکا تایبەت بوو. ئدریس و دزەیی ڤەگەریانە مالێ، و فەرهاد و دۆسکی ل نەخۆشخانێ ل دەڤ بارزانی دمینن.

هەر هەمان ڕۆژ ڕەوشا بارزانی یا باش بوو، ئاگەه ژ خۆ بوو و دئاخڤت و چ ئێشان نەبوون. ل وێ ڕۆژێ چ ڕوودان نەدان هەتا دەمژمێر پێنجێ ئێڤاری؛ مەلا مستەفای داخواز ژ فەرهادێ برازایێ خۆ کر کو پەردێن پەنجەرا ژوورێ لابدەت و وی ب دانیتە ل سەر کورسیەکێ دا کو ب وێ پەنجەرێ بەرێ خۆ بدەتە ژ دەرڤە.

فەرهاد و مەحمودی هەر زوويکا گۆهداریا وی کر. فەرهادی دەستەکێ وی ئێخستە پشتا خۆ و دەستێ خۆ یێ دی ئێخستە بن چۆکێن وی دا کو ڕاکەت، بەلێ دیت ڕەنگێ وی گەلەک هات گوهرین و پیچەک هش ژ خۆ نەما. پاشی جارەکا دی دانا سەر جهێن وی. پشتی بارزانی پیچەک بێهنا خۆ ڤەدایی، ب چاڤێن خۆ یێن ڕەش و تیژ سەحکرە فەرهادی و گۆتێ:

«جارەکا دی پێکولان بکە تو من بدانیە ل سەر کورسیەکێ ل بەر پەنجەرێ.»

بەلێ فەرهادی نەدڤیا وێ داخوازیا وی بجهـ بینیت، چونکی بارێ جەنەڕالی یێ تەندروستی تێک دچوو ل دەمێ ژ سەر جهێن وی ڕاکرابا. بەلێ بەردەوام داخواز دکر ژ سەر جهێن وی ڕاکەن. دیسان جارا دوویێ فەرهادی مستەفا بارزانی ژ سەر جهێن وی ڕاکر، مەحمودی دیت ڕەنگێ وی یێ شین و مۆر دبیت. ل دەمێ ژ سەر جهێن وی بلندکری، سەرێ وی کەڤتە ل سەر ملێ فەرهادی.

فەرهاد و دۆسکی گەلەک ترسیان و ب لەز گازی نۆژداران کرن. ئەو دوو خولەکان گیرۆ بوون هەتا گەهشتینە ژوورێ. نۆژداران پشکنینێن ب لەز بۆ کرن و گۆتن ئەوی یا وەغەرکری.

ڤەگەڕاندنا تەرمی و ڤەشارتن

پشتی چار ڕۆژان، ل 5-3-1979 ل سەر وەسیەتا بارزانی، تەرمێ وی ب فڕۆکەیەکێ گەهشتە شنۆیا ڕۆژهەڵاتا کوردستانێ. د ڕێورەسمەکێ ژ هەژی و بێوێنە دا، ب دەهان هزار کوردان ژ هر چار پارچەیێن کوردستانێ بەشداربوون د پێشوازیا تەرمێ بارزانی دا هەتا کو هاتیە ئاخسپاردن.

«یا ژ هەژی گۆتنێ یە پشتی باشتربوونا باردۆخێ سیاسی یێ باشوورێ کوردستانێ و ئازادبوونا دەڤەرێن کوردی ژ بن دەستێ ڕژێما بەعس، ل 6-10-1993 تەرمێ جەنەڕال مەلا مستەفا بارزانی و کوڕێ وی ئدریس بارزانی ب پێشوازیا هزاران کەسان ل بارزان هاتنە ڤەشارتن.»