دناڤبەرا ملیارێن هاتینە دزین، و ئازارێن سێوی و هەژاران دا، داهاتێ عیراقێ دچیتە کیڤە...!

ل هەمی دەولەتێن جیهانێ بهایێ دەولەتێ ب وێ چەندێ دهێتە پیڤان کا چەند گرنگیێ ب کەسانێن لاواز و هەژاران ددەت بەری یێن بهێز، بەلێ ل عیراقێ ئەم ل بەرامبەرى هەڤدژاتیەکا دل ئێشین، وەڵاتەکێ ل سەر دەریا گەنجینە و نەفتێ یە، بەلێ د بەرامبەر دا ب هزاران زارۆکێن سێوی و هەژار و خودان پێدڤیێن تایبەت ل سەر جاددە و کولانان د بێبەشن و د پشتگوهـ هاڤێتی نە.

ئەوا ئەڤرۆ ل ڤی وەڵاتی رووددەت نە کێمبوونا پارەیی یە بەلکو نەبوونا وژدانا سیاسی یە، ئەو ژمارەیێن ئەم رۆژانە د دۆسییێن گەندەلیێ دا دبینین و ئەو ملیۆنەها دۆلارێن رۆژانە ب ڕوونی دهێنە دزین و دچنە د بەڕیکێن گەندەڵکاران دا تێرا هندێ دکر کو باشترین نەخۆشخانە و قوتابخانە و سەنتەرێن ڕاهێنانێ یێن پێشکەفتی پێ بهێنە ئاڤاکرن، دا کو ژیانەکا شایستە بۆ ڤان مرۆڤان مسۆگەر بکەن.

یا سەیر ئەوە کو ئەڤ گەندەڵی و تاڵانکرنە نە یا نوو یە بەلکو هەمان سیستەمێ نڤستی و سیاسەتێن ڕابردوو یێن بەردەوامن یێن کو نەهاتینە گوهۆڕین، بتنى دەم هاتیە گوهۆڕین بەلێ عەقلیەتا گەندەڵیێ وەک خۆ مایە، سیاسەت د بنەڕەت دا بۆ خزمەتکرنا مرۆڤی هاتیە داهێنان و دەمێ دەسەڵات شکەستنێ د دابینکرنا پاراستنا چینێن بێ هێز د جڤاکی دا دئینیت، وی دەمی شەرعیەتا خۆ یا ئەخلاقی بەری یا سیاسی ژ دەست ددەت، بەردەوامییا ڤی بارودۆخی و تالانکرنا خێراتێن وەلاتی ب ڤی ڕەنگی مە د ئێخیتە بەرامبەر ڕاستییەکا تال، گەندەلی ئێدی تنێ دزینا مالێ گشتی نینە، بەلکو دزینا پاشەڕۆژا ڤان زارۆک و هەژارانە یێن کو چ دەنگ نینن.

ئەرێ گەندەڵی بوویە سیستەمەکێ فەرمی یێ بڕێڤەبرنێ، یان دەولەت بخۆ بوویە پاشکۆیێ گەندەڵیێ؟

د راستی دا گەندەلی د ناڤ دەزگەهێن دەوڵەتێ دا هاتیە یاساییکرن دەسەڵاتا یاسا و ئیدارا کارگێڕی کرینە ئامرازەک بۆ پاراستنا بەرژەوەندیێن خۆ یێن تایبەت، و ب ڤێ چەندێ شەرعیەتا یاسایی و ئەخلاقی یا دەولەتێ ژناڤ بریە، دادی ناهێتەدان هەتا ئەو پارێ دهێتە دزین نەبیتە پڕۆژە بۆ خزمەتا سێوی و هەژاران چاکسازییا ڕاستەقینە پێتڤی ب ئیرادەکا سیاسی یا ب هێز هەیە دا کو یاسا ل سەر هەمیا وەکهەڤبیت.