Kurd Diaspora
خۆڕاگریا هەرێما کوردستانێ ل بەرامبەر فشار و گەفێن تێکدەرانە
ئیرادەیا خۆڕاگریێ و سەروەریا قەوارەیێ دەستووری
ئەڤ سنوربەزاندن و فشارێن بەردەوام، بزاڤەکا ئاشکرایە بۆ تێكدانا ئارامییا هەرێما كوردستانێ و لاوازكرنا پێگەهێ وێ یێ دەستووری و سیاسی. هەولێن ب ڤی شێوەی تنێ نیشانا بێ دەستهەلاتیا ئەخلاقی و سیاسی یا وان هێزانە بەرامبەر ئیرادەیا مللەتێ کورد و خۆڕاگڕیا هەرێمێ و دەسکەفتێن وێ دناڤ کۆمولگەها نیڤدەولەتیدا. سەرەڕای ڤان هەموو فشارێن سەربازی و دەروونی، ئازایەتییا مللەتی و دامەزراوەیێن هەرێمێ زۆر ژ وێ بهێزترن، کو ب ڤان بزاڤێن ترسنۆکانە ب لەرزن. ئەڤ قەوارەیێ دەستووری نە تنێ ئەرکەکێ نیشتمانییە، بەلکو ئەنجامێ خەبات و خوینا هزاران شەهیدانە، کو تێکدانا وێ نە کارەکێ ب ساناهییە.
سیاسەتا دروستکرنا ئاستەنگان ل سەر هەرێما کوردستانێ، نە تنێ هەولەکا سەربازی یا دەمەکی یە، بەلکو ستراتیژیەکا دارێژتی یە بۆ دروستکرنا فشارێن ئابووری، و هەژیانێن سیاسی، ئاسایشی. ئارمانجا سەرەکی تێکدانا وێ سەقامگیریێ و پێگەهێ کو هەرێما کوردستانێ ل دەڤەرەکا پڕ ئالۆزی دا ئاڤا کری. ئارمانج گرتن و هێرشکرنا لسەر سەرۆکێ حکومەتا هەرێمێ نەخاسمە سەرکردەکێ وەکو جەنابێ برا گەورە "مەسرور بارزان"ی، پشت و چۆکێن ئەندازیارێ ئاڤەدانیێ و رێبازا خەباتێ سست و خاڤ ناکەن، بەلکو بهێزتر پەیتر و قائیمتر لێ دکەن. بکارئینانا درۆن و مووشەکان دگەل فشارێن سیاسی و ئابووری بشێوەیەکێ هەرەمەکی دور ژ هەموو رەوشت و نەریتێن مرۆڤایەتی د راستیدا نیشان و رەنگڤەدانا لاوازیێ و چەقبەستنا دبلۆماسیا ئەوان لایەنایە ل هەمبەری رەوشا خۆیا سیاسی.
شەرعیەتا هەرێمێ و بەرپرسیارەتیا بەغدا
ئەڤ لایەنێن تێکدەر باش وێ راستیێ دزانن کو قەوارەیێ هەرێمێ لسەر پالگەهێ جەماوەری، مێژوویی و دەستووری هاتییە ئاڤاکرن، ژ بلند گێرانا رۆلێ سیاسی، ئابووری، کۆمەلایەتی یێ هەرێمێ ل سەرانسەری جیهانێ دترسن. رەفتارکرنا هۆشمەندانە د ڤان قۆناغێن دژوار دا، سەلماندیە کو ماقویلیا سیاسی مەزنترە ژ لێدانێن ئاسێ یێن گروپێن چەکدار، بەڵگەیە ل سەر هێز، شەرعیەت و هەبوونا مەنتقێ دەولەتداریێ ل هەولێرا پایتەخت. و بەرەلایێ دبەرفرەهکرنا چەپەرێن دوژمنداریێ خودیکا بێ دەستهەلاتیێ، ڤەدەربوون ژ جیهانا نیڤدەولەتێ، و ژ دەست دانا بنەمایێن رەوا یێن حکومداریێ ییە. مانەیا ئەڤان لایەنێن نە یاسایی خرڤەکرنا دوژمن و نەیاران لدۆر هێلا عیراقێ ژ پێخەمەت بەرژەوەندیێن دەرەکی.
ئەگەر ب راستی عیراقێ سەروەرییا دەولەتی هەبیت، فەر و پێدڤییە دەستەیا حکومرانیێ ب تایبەت ژی سەرۆک وەزیران ئەڤێ ئاریشا بەرەلاییێ د هێزێن چەکدار یێن ژ یاسایێ دەرکەفتین بزوویترین دەم چارەسەر بکەت، و فیدرالیانە رەفتارێ بکەت. ئەڤ بارگرانیە لسەر رەوشا هەرێمێ ب تنێ نینە، بەلکو بن پێکرنا خوەسەری و دەستورێ عیراقێیە ل پێش کوردستانێ، ژ دەست دانا کۆنترۆلا سەربازی و نە پاراستنا ستوونێن دەستوری سەرەکیترین بنەمایێن ڤەدەربووونێنە ژ مەیدانا نێڤدەولەتی و پڤبوونا قەیرانا بێباوەریێ دناڤبەرا گەل و دەستهەلاتا فیدرالی دا. عیراق ب پاشئێخستنا چارەسەریێ و پشت گوهـ هاڤێتنا ئەڤێ چەندێ رێز و رێزانییا وەلاتێن دیتر بدەستڤە نائینیت.
comments (0)
No comments yet