Kurd Diaspora
ئەدەبێ ژنان: د ناڤبەرا پێناسەیا تایبەتمەند و یەکبوونا پەیاما ئەدەبی دا
پێناسە و تایبەتمەندییا نڤیسینا ژنان
ئەدەبێ ژنان ئەو ئەدەبە یێ ب هزر و بیر و دیتن و ب دەست و تل و پەنجێن ژنان هاتییە نڤێسین، تێدا ژن بخۆ بەحسێ ئێش و ئازار و دەردەسەری و نەهامەتیێن خۆ دکەن، هەکە د ناڤ خێزان و جڤاک و وەڵاتیدا تووش دبن؛ چونکی پتر دەستێ مرۆڤی دزانیت کیڤەیا مرۆڤی دخۆڕیێت.
ئەڤە وێ واتایێ ناگەهینیت کو ئەدەبێ ژنان بەس ئەو ئەدەبە یێ ژن دنڤێسن، نەخێر؛ گەلەک زەلام ژی ب هزر و بیر و دیتنێن ژنان دنڤێسن، وەک هزر و بیر و دیتن و پێنووس دچنە د قالبێ ژناندا و ل سەر ژنان دنڤێسن، تابلۆیێن جوان ل سەر ئێش و ئازار و نەخۆشییێن وان دنڤێسن و پێشکێشی مە دکەن. هەرچەندە دبیت ئەو وەکی ژنان نەشێن دەربڕینەکا راست و دروست و تەندروست ژ ئازارێن ناخێ ژنان بکەن، وەلێ ئەو ژی هندەک ئێش و ئازارێن وان دیار و بەرچاڤ دکەن.
مشتومڕا پۆلێنکرنا ئەدەبی (تەسنیفکرن)
هندەک نڤیسەر و ئەدیب دگەل هندێ نینن ئەدەب بهێتە پۆلێنکرن و بێژن ئەڤە ئەدەبێ ژنانە و ئەڤە ئەدەبێ زەلامانە؛ هەما دبێژن ئەدەب ئەدەبە، ڤێجا کێ بنڤێسیت ژن بیت یان زەلام بیت. ئەم پەسەندا ڤێ ڕەئیێ دکەین، ڤیابا هۆسا ئەدەب نەهاتبا پۆلێنکرن؛ چونکی چ خالێن هۆسا دیار و بەرچاڤ نینن تۆ ئەدەبێ ژنان و زەلامان ژێک جودا بکەی، هەردوو ئەدەبن و دڤێت بۆ خزمەتا مرۆڤ و جڤاکی بهێنە نڤێسین، چ ژنێ نڤیسیبیت یان زەلامی.
هەرچەندە ل ڤێرە کۆڕ، سمینار و دیبەیت ل سەر ئەدەبێ ژنان دهێنە کرن و گێڕان و تێدا ڤەکۆلەر ل سەر ڤی ئەدەبی دئاخڤن، لێ چ تشتەکێ هۆسا زیق و دیار بەرچاڤێن مرۆڤی ناکەڤیت کو وی ئەدەبی ژ ئەدەبێ گشتی جودا بکەت. هەردوو ئەدەب تێکەلهەلکێشیاینە و ئێکودوو تەمام دکەن و خزمەتا جڤاک و مللەتێ خۆ دکەن.
تعليقات (1)
دةست خوش ماموستا