رۆژێن تە ژیانا تەنە

تە ژی وەکی من هەسپێکریە کو هەمی رۆژ ئێدی وەکی ئێک دبورن چ خوشی و تامێن تایبەت تێدا نینن؟ دەمێ سپێدێ ژ خەو رادبی و خودێ رۆژەکا دی دابیتە تە و دەلیڤەکا دی یا دایە تە تو بژی و جیاوازتر بکەی، بەلێ ژ هەمی دلێ خو تو دبێژی: "دیسا ئەڤرۆ ژی دوبارە بینا دوهیە"، و هەر بڤێ ئاخفتنێ رۆژەکا دیا وەکی دوهی یان نەخوشتر دبورینی، بێی کو ب درستاهی چ تشتێ نەخوش روی دابیت.

مە بو ماوەیەکێ درێژ یا هزرکری کو رۆژا خوش و جیاواز یا د هندێ دا کو تشتەکێ مەزن روی بدەت؛ ئاهەنگەك، جەژنەك و..هتد. بەلێ د راستیدا ئەم ئەڤێن هوسا خوشیێ د بەین و هزر دکەین هەتا دڤان دەماژیدا ئەم دل خوش نەبوینە. بوچی؟

چونکی خوشی بخۆ نە تشتەکە روی ددەت، خوشی باردوخێ مێشکێن مەیە و دڤێت ئەم د سەرێن خۆدا ئاڤا بکەین و پەیدا بكەين. خوشى چ جارا د تشتێن مەزن دا نەبویە، خوشی هەردەم ئەو دەمێن کورتن یێن ئەم تێدا دژین کو هەسپێبکەین و تێدا د ئامادەبین. ئەگەر نە، ئەڤە مە خوشی د رۆژا خودا نەبر نە چونکی چ تشت چێنەبو، بەلکو ئەم تێدا نەژیاین و د ئامادە نەبوین. دڤێت ئەم بزانین ب وێ ڕێکا ئەم رۆژا خو دبورینین، ئەم ژیانا خو دبورینن.

ئەز باورم کا چەوا ڤان ڕێکا هاری من کر کو رۆژا من رۆژەکا نوی بیت ل شوینا کو رۆژەکا دی بیت، و هێلا ئەز د بچیکترین و سادەترین دەما دا دلخوش ببم، دێ گەلەک هاری وەژی کەن.

خالێن گرنگ بۆ دەستپێکرنا رۆژەکا جیاواز:

1. رۆژا خو ب مەبەست دەسپێبکە: هەر سپێدێ دەمێ رادبى ئێکسەر نەچە تێلەفونا خۆ، چ ئاخفتنێن نەرێنی نە بێژە. هەر دەمێ چاڤێن خو ڤەدکەی بگرنژە؛ بلا هەست ب چ دلخوشیێ نەکەی ژی، بێی چ ئەگەر بگرنژە. پيچەكێ براوستە و بێژە خۆ: "ئەو چ جورە مرۆڤە یێ ئەڤرۆ من دڤێت ببمێ؟". بلا بەرسڤێن تە د سادە و کورت بن، وەکی: "دێ هەولدەم پتر ئاخفتنێن ئەرێنی بێژم". مەبەستەکا بچیک ژی دێ رۆژا تە ب تمامی گوهوریت.
2. لەشێ خۆ ب لڤینە: ئەگەر تە چ جارا چ وەرزش نەکربن دزانم دێ بو تە بزەحمەتبیت، بەلێ تو نزانی چەند گوهورینێ دێ د رۆژا تەدا چێکەت هەتا ئەگەر بو ٢٠ خولەکا بیت. یوگایێ بکە، هەرە ڕێڤەچونەکێ، یان ل مال تەمارینا بکە. مێشکێ تە دێ دەسپێکەت باوەرکەت کو تو یێ دهێیە گوهورین، دێ هورمونێ دلخوشیێ ل دیڤدا بو لەشێ تە بەردەت و هوسا زەوقێ تە دێ خوشتربیت، هێزا تە دێ ئەرێنی بیت، و فوکسا تە بهێزتر بیت.
3. هەلبژاردنێن باشتر بکە نە یێن بێ کێماسی: نەکو دڤێت ئەڤرۆ تو یێ بێ کێماسیبی، بەلکو هندەک هەلبژاردنێن باشتر ژ دوهی بکە. تە دوهی ئاخفتنەکا نەخوش گوتە خۆ دەمێ تە خەلەتیەک کری؟ ئەڤرۆ براوستە و هەلبژێرە کو دلوڤانتر بی دگەل خۆ.
4. فوکسا خو ب پارێزە: هین نزانن ئەڤە چەندا بهێزە! یا تو گرنگیێ ددەیێ، ئەوە یا دێ دژیانا تە دا زێدەبیت. فوکسا تە هێزا تەیە. ژبەر هندێ د تێلەفونا خۆدا تشتێ بێ رامان و مفا ژێببە، کێمتر هەرە د سوشیالێدا، و ژ مرۆڤێن نەرێنی دویر بکەڤە هندی بشێی. ئەگەر تو کونترولا هندێ نەکەی کا گرنگیا تە بو چ دچیت، هەر تشتەکێ د بەر مێشکێ تەرا بچیت دێ کونترۆلا مێشکێ تە کەت.
5. تشتێ بزەحمەت دەسپێکێ بکە: بو من بخو تەمارین گەلەک بزەحمەتن، هندەک جارا ئەز دیوارا پاقژ دكەم بەس دا نەچم تەمارينا بكەم! بەلێ ئەو رۆژا ئەز دەسپێدکەم تەمارینێن خۆ دکەم، رۆژ هەمی بو من دمینیت و تشتێن دیڤدا گەلەک بساناهی دکەم، و پتر هانا من دهێتەدان.
6. هەرۆژ تشتەکێ نوی فێرببە: ئەز هندەک جارا بتنێ پەرەكى ژ كتێبێ دخوینم، یان گوهێ خو ددەمە پودكاستەكێ، یان هزرەکێ ل سەر خۆ جێبەجێ دکەم. ئەز دزانم مێشکێ من هەرۆژ یێ پێتڤی ب تشتەکێ نوی یە دا مەزن ببیت، و هەر چنەبیت بلا تشتەکی بدەمێ هەتا ئەگەر یێ بچیک ژی بیت.