مافێ خواندنێ، ڕوناهیا پاشەڕۆژا ئافرەتێ یە

خواندن دەرگەهێ سەرەکی و بایەخدارە بۆ ناسکرنا هەمی مافێن دی یێن مرۆڤی. دەمێ ئەم بەحسا مافێ ئافرەتێ دکەین د خواندنێ دا، ئەم ب تنێ بەحسا پەیڤەکا لسەر کاغەزێ ناکەین، بەلکو بەحسا مافەکێ بنەڕەتی یێ مرۆڤایەتییێ دکەین، کو ئاراستەیا ژیانێ د گۆهۆڕیت. ڕاستیا وێ ئەڤەیە، پێگەهاندنا کچەکا خواندەڤان و زیرەک، ب رامانا ئاڤاکرنا نفشەکێ هشیار و دارشتنا جڤاکەکێ سەربلند و پێشکەفتی یە.

بۆچی مافێ خواندنێ بۆ ئافرەتێ یێ گرنگە؟

پاراستن ژ زۆرداریێ: ئافرەتا خودان زانست و سەنگ، چ جاران ڕێ نادەت کەس زۆرداریێ لێ بکەت، یان مافێن وێ بن پێ بکەت، چونکی ئەو یاسا و ڕێکارێن خۆ باش دزانیت و دشیاندایە ب باوەری ب خۆبوون ڤە بەرگریێ ژ ڕامان و کەرامەتا خۆ بکەت.

پشکداریا ئابووری: خواندن دەرگەهێن بەرفرەهـ یێن بازارێ کاری ل بەرامبەر ئافرەتێ ڤەدکەت. ئەڤە ژی ئێکسەر دکەڤیتە د بەرژەوەندیا ئابووریا خێزانێ و هەمی وەلاتی دا، چونکی چ جڤاک نەشێن تنێ ب هێزا زەلامی بەرەڤ پێش بچن، بێی کو هێز، هزر و شیانێن ژنێ ژی د هەمی گۆڕەپانان دا سەنگا خۆ نەبیت.

ئەرکێ جڤاکی و دەولەتێ چییە؟

هشیارکرنا خێزانان: پێتڤییە ئاستێ تێگەهشتنێ د ناڤ خێزانان دا ب شێوەیەکێ وەسا بێتە بلندکرن، کو چ جوداهی د ناڤبەرا کوڕ و کچا د دەرفەتێن خواندنێ دا نەهێتەکرن.

دابینکرنا دەرفەتان: دەولەت و لایەنێن پەیوەندیدار ئەرکدارن قوتابخانە و ناڤەندێن زانستی ل هەمی دەڤەران، ب تایبەتی ل گوند و ناوچەیێن دورەدەست ئاڤا بکن، دا کو چ کچ ژبەر دووریا ڕێیێ یان کێماسیا خزمەتگوزاریان ژ خواندنێ بێبەهر نەبن.