دێ شعرەکێ نڤێسم

من دڤێت شعرەکێ بنڤێسم
من بلند بکەتە بەر پەرێن ستێرا و
جوانیێ ژێ بچنم

عەورێن رەش و تاری
ل ھنداڤ بانێ شعرا ڤەرەڤینم

شعرەک بیت
دەربازی ھەمی سنوورا ب بیت
ب چیتە دەف خانی و جزیری
گازی بکەتە میری و گزیری
دفەرھەنگا وێدا نەبیت پیری
گرێیا ڤەکەت ب زانا و ژیری
ھەمیا ژ خەوا گران ھشیار کەت !

شعرەک بیت
دووکێل ژ گزوزێ پەیڤێن وێ نەچیت
ئەوێن شرۆخەو شەلوالێن کوردایەتیێ
چیق چیق کرین و کرینە دڤێل
بو نە بیتە بەرگدروو و بو پنی نەکەت

شعرەک بیت
ب بیتە گژلۆک و تەڕگ
زەڤیێن درەوا ھەمیا داقۆتیت
دەرسوکا کەچەلی ژ سەری ب فڕینیت
کەچەلێ وی ب تەیسینیت

شعرەک بیت
ببیتە باران بو زەڤیێن ھشک و بەیار
ب بیتە رەزڤان
بو باخچێن بێ خودان
ب بیتە پیت و پەیڤ
پاری و نان
زارۆکا فێرکەت
برسیا تێرکەت
رەوشتی شێر کەت

ئھا من دڤێت شعرەکا ھوسا بنڤێسم
لێ ھندێ دئێمێ نەشێم بنڤێسم،
دێ بزاڤا کەم شعرەکا ھوسا بنڤێسم !