پەرتووکا "گەشتا وێ و باوەریا من"بۆ وان دەیك و بابان یێن دڤێن درست د ناخێ زارۆکێ خوە یێ جیاواز بگەهن، پەرتووک ژ نڤیسینا بەڕێز "هەدار تەها" یە ل ژ پارێزگەها دهۆک، کو ئەزموونەکا ڕاستەقینەیە هاتییە نڤیسین و ئامادەکرن، پاشی پێشکێشکرن وەکی جوانترین و گرنگترین دیاری ژ بۆ پەرتووکخانەیا کوردی، ب تایبەت وان خێزان و دەیك و بابێن زارۆکێن وان ژ هەمی لایان ڤە "هزری، لەشی، دەروونی..هتد" د جیاوازتر بن ژ زارۆکێن دەوروبەر.

هەلبەت پەیڤا "جودا یان جیاواز" دبیت هندەک پرسیاران ل دەف مە پەیدا بکەت، لێ ل ڤێرێ مەرەم پێ ئەوە ئەو زارۆکێ جودابیت ژ هەڤالێن خوە، ژ چەوانیا هزرکرنێ، سەرەدەریکرنێ، لڤین، لەشی، فێربوونەکا جیاواز. ئەو دەیك و بابێن ئەنیا وان ژ خوها ماندیبوونا پەروەردە و بەزا ب دویڤ زارۆکێ خوەڤە، دێ گەلەک مفای ژ ڤێ سەربوڕا سەرکەفتی و جوان بینن، چونکی دبیت ئەو هزر بکەن ئەڤ تشتێ زارۆکێ وان دکەت ل ناڤ خەلکێ و دیوانان، بۆ خوە بکەن شەهمزاری و شەرم و دەستێن خوە دانن سەر ڕۆییێن خوە یێن سۆڕ بوویی ژ شەرماندا، هەلبەت پشتی خواندنا ڤێ پەرتووکێ ب ڕێژەیەکا باش دێ ئەڤ هزرا نەرێنی هێنە گهۆڕین ب هێزەکا ئەرێنی یا ئاڤاکەر و پێشکەفتی، تژی ژ هیڤی و ئۆمێدێن نوی ژ بۆ پاشەڕۆژا وی زارۆکێ بەهر د ڤێ ژیانێدا هەی.

دڤێت ئەم د ڤێ جیهانێدا هەر تشتی ب ڕاستیا وی یا درست ڤە وەرگرین و ل سەر ڕازی ببین، ئانکو د ئاشۆپاندا نەژین. هەر تشتێ هاتە ڕێکا مە ئەگەر سرۆشتی وەرگرین باوەرناکەم چ ئاریشە ل سەر درست ببن، ئەگەر ئاریشە ژی بیت دێ چارەیا وێ یا بلەزتر بیت. لێ نەبیتە ئەگەرێ تێکبرنا دەروونێ خێزانەکا تەمام، چونکی ئێك ئەندام وەکی وان نینە"ب گشتی".

گرنگی و مفایێن پەرتووکێ بۆ جڤاکی

ئەڤ پەرتووکە دێ گەلەك جهـ و لایەن دێ مفای ژێ وەرگرن، لێ ئەگەر خوە لێ بکەن خودان، بۆ نموونە: سەنتەرێن ئۆتێزمێ، قوتابخانەیێن تایبەت، خێزان ب گشتی"تایبەت ئەو خێزانێن ئۆتیزمەك د ناڤدا هەبیت". چونکی هەتا نوکەژی ئەو هزرا نەجوان یا دناڤ بەشەك ژ جڤاکێ مە دا هەی (هەلبەت ژ نە شارەزایی و نەخواندەڤانیێ یە) کو نەڤێن چ کەس بزانن کو زارۆکەکێ وان یێ جیاوازە یان ئۆتیزم یان هەر حاڵەتەکێ دی یێ ل دەف هەی، بۆچی؟