"ئیمناهی" ئەو سیبەرا خەونێن مە دپارێزیت

د فەرهەنگا گەلان دا، نیشتمان مەزنترین شانازییە کو هەر تاکەک دشێت خۆ پێ بناسینت، بەلێ جوانی و هەیبەتا ڤی نیشتمانی د ئێک تشتێ سەرەکی دا کۆم دبیت، ئەو ژی "ئارامی"یە. زۆر جاران مرۆڤ دبێژیت خوارن و ڤەخوارن پێدڤیێن سەرەکینە، بەلێ ڕاستی ئەوە کو ئیمناهییا وڵاتی ژ خوارن و ڤەخوارنێ گرنگترە؛ چونکی د ناڤ جەنگ و نەئارامیێ دا، خۆشترین خوارن تامێ نادەت و بێدەنگترین شەڤ نابیتە جهێ ڤەحەویانێ.

ئارامی ب ئەرزانی ب دەست نەکەفتییە و ب ساناهی ژی ناهێتە پاراستن. دیرۆکا مە سەلماندییە، کو ئارامی بەرهەمێ قوربانیدانێن بێ وێنەیە. هەر ب بهوستەکا ڤێ ئاخێ کو ئەڤڕۆ ئەم ب ئارامی ل سەر دژین، ب ڕووبارێن خوینا مێرخاس و عەگیدێن ڤی وڵاتی هاتییە پاراستن. کاروانێ قوربانیدانێ یێ بەردەوامە، چونکی دوژمن و نەیارێن ئارامییا مە د زۆرن و هەردەم ل دەرفەتەکێ دگەڕێن دا کو ڤێ تەباییێ تێک بدەن. ئەڤ ئیمناهییا مە هەی ب هەروە نەهاتییە، بەلکو قەرزەکێ گرانێ شەهیدانە ل سەر ملێ مە هەمییان.

د هەر وڵاتەکێ ئارام دا، دڵسۆزییا هاوڵاتییان مەزنترین چەکێ پاراستنێیە. ئیمناهی ب تنێ ئەرکێ دەزگەهێن ئەمنی و پۆلیسان نینە، بەلکو ئەرکێ وی هاوڵاتییە ژی یێ کو ل سەر کارێ خۆیە. دەما هاوڵاتی دبیتە چاڤێ دەزگەهێن ئیمناهیێ و پشتبەستێ ب حکومەتا خۆ دکەت، ڕێ ناهێتە دان چو دەستێن پیس و پیلانێن تیرۆرستی بگەهنە ناڤ باژێڕ و باژێڕکێن مە. سوپاس بۆ خودێ، هاوڵاتییێن مە د هۆشیارن و هەر ئێک د جهێ خۆ دا ڕۆڵێ پارێزەرێ ئاسایشێ دبینیت.

بەلێ، ل ڤێرێ پێدڤییە پتر جەختێ ل سەر وێ چەندێ بکەین کو دڤێت هەمی دەما "چاڤ ڤەکری" بین. تیرۆر و دوژمن هەردەم مفایی ژ تارییێ و بێدەنگیێ وەردگرن. داخوازیا من ژ هەر نیشتمانپەروەرەکی ئەوە کو دگەل هێزێن ئیمناهیێ د هاریکار بن. هەر گۆمانەک یان هەر لڤینەکا نەدرۆست، دڤێت وەک ئەرکەکێ ئایینی و نیشتمانی بهێتە ڕاگەهاندن؛ دا کو چو دەرفەت ب تیرۆرستان نەهێتە دان ئارامییا مە تێک بدەن و دلێ دایکێن مە ڕەش بکەن.

ل دووماهیێ من دڤێت بێژم، ئارامی ئەو سیبەرە یا کو ل بەر وێ زارۆکێن مە دچنە قوتابخانێ و گەنجێن مە خەونێن پاشەڕۆژێ دبینن. پاراستنا ڤێ سیبەرێ، وەفادارییە بۆ خوینا شەهیدان و مەرجێ سەرەکیێ مانا مەیا ب سەربلندییە. بلا درووشمێ مە هەردەم ئەڤە بیت: نیشتمانەکێ ئارام، پاشەڕۆژەکا گەش و ئاڤایە.