د جڤاکێ مە دا، گەلەک جاران وێنەیێ ژنا باش وەسا دهێتە نیشاندان کو ئۆتۆماتیکی پێدڤیە ژنا خۆبەخش، بێدەنگ، و خوفیداكەر بیت بۆ خۆشکرنا ژیانا دەورۆبەرێن خۆ. ژن ژ دل هەول ددەت ببیتە هەڤژینەکا بێ کێماسی، دایکەکا نموونە، و پەناگەهەك بو ئارامیا خێزانێ هەمیێ. لێ پرسیارا ب ئازار ئەڤەیە، كو د ناڤ ڤێ هەمی بەخشینێ دا، ئارامی و حەزێن ژنێ بخۆ ل کیڤەنە؟

وەستیانا سۆزداری (Burnout) چیە و چاوا ڕویددەت؟

هەردەمێ ژن بەردەوام پێدڤی و هەستێن دەورۆبەرێن خۆ د ئێخیتە بەری هەست و پێدڤیێن خۆ، ئانكو بێی گرنگی ب هەست و پێدڤیێن ژنێ بخو بهێتەدان، هەستەکێ بێدەنگ دناخێ وێ دا دروست دبیت، كو دبێژنێ وەستیانا سۆزداری. ژن دناخێ خۆ دا هەست ب كێماسی و نەئارامیێ و کێمبوونێ دکەت، نەبتنێ ژبەر وەستیانا جەستەیی، بەلکی ژبەر کو هەست دکەت دلێ وێ هاتیە پشتگووهـ هاڤێتن، ئەڤ وەستیانە جاران خۆ وەک توڕەبوونەكا زێدە و تەقینەكا سوزداری، بێهێزیا دەروونی، یان هەستکرن ب كومبوونا ئازارێن نەگوتی و تاڕیكیەكا كویر دناخی دا د پەیوەندیا هەڤژینیێ دا نیشان ددەت.

لڤێرێ دێ بەحس ل چوار پێنگاڤێن زانستی بو بنیاتدانانا ئارامیا دەرونی یا ژنێ كەین:

1. دانانا سنوورێن سۆزداری یێن ڕوون (Emotional Boundaries): ڕاستیەكا دەرونی هەیە كو دبێژیت؛ ئارامیا سوزداری و تێربونا ڕوحی(مروڤ ژلایێ دەرونی و هەست و سوزان ڤە یێ تێربیت)، ژ دانانا سنووران دەستپێدکەت، دانانا سنووران ژی د ناڤ خێزانێ دا ڕەتکرنا هەڤژینی یان زارۆکان نینە، بەلکو پاراستنا وێ وزە و ئارامیێ یە یا کو شیانا ددەتە تە ب حەژێكرنەكا ساخلەم و تەندروست بەردەوامیێ ب پەیوەندیا خۆ یا هەڤژینیێ بدەی، و هەڤسەنگیێ بكەی دناڤبەرا ئەركێن خو یێن هەڤژینیێ دا و حەز و ئارامیا ناخێ خودا بونمونە ئاسایی یە ب بێی شەرم و هەستکرن ب تاوانباریێ بێژی "ئەز نوکە گەلەك ماندی مە و پێدڤی ب دەمژمێرەكا ئارامیێ مە"مرۆڤ نەکەرەستەیە کو هەردەم بێهنڤەدانێ نەکەت؛ و گەلەك نمونێن دیژی یا گرنگە بتایبەت د دەستپێكا هەڤژینیێ دا هەردوو لایەن دگەل ئێك گەنگەشێ بكەن دەربارەی سنوران و سنورێن هەردوو لایان د پاراستی بن و ڕێك بكەڤن لسەر ڤێ چەندێ؟ ژبەركو پاراستنا سنووران، تە ژ سوتنا دەرونی دپارێزیت.
2. ڕاستگۆیی د ئاخڤتنێ دا ل شوینا بێدەنگیا بریندارکەر: دەما تشتەک د ناڤبەرا تە و هەڤژینێ تە دا ڕوویددەت، کو دلێ تە نەئارام دکەت، ب ئارامی بەحس ل هەستێن خۆ بکە و ب شێوازەكێ جوان و ڕێكوپێك بگەهینە هەڤژینێ خو، نەکو ب بێدەنگی ناخێ خۆ بئیشینی. ڕاستگۆیا سۆزداری پرەکا گەلەك بهێزە بۆ نزیکبوونا هەڤژینان.
3. خۆ مژویلکرن ب بۆشاییەکا کەسایەتی: تە وەک ژن ژیانەکا تایبەت ب خۆ هەبوو بەری خێزانێ!دووبارە ڤەگەڕیان بۆ حەزەکا كەڤن، خواندنەكا کورت، وەرزش یان چالاكیەک کو ب تنێ یا تە بیت، و وزەیا تە نووی دکەتەڤە و هەستێ سەربەخۆبوونێ بهێز دکەت.
4. دابەشکرنا بەرپرسیاریاتیان دگەل هەڤژینی: ژیانا هەڤژینی بزاڤەکا هەڤبەش و دوولایەنیە، نە ڕاکێشانا هەمی بارێ مالێ ب بتنێ بو ئێك لایەن. ڕێ ب هەڤژینێ خۆ بدە کو ئەرکان دگەل تە دابەش بکەت و دەستکەفتێن بچووک ژی ب بلندی تەماشە بکە.