ئـــافرەت و لـــەش

ئەرێ بۆچی؟، د درێژاهيیا دیرۆكێ و د کەلتۆرێ کوردی دا ژن یا بەرنیاس بوو ب هێز و خۆڕاگری و ژیرمەندی و ئاڤاکرنا ژیانێ؟ بگرە ژ ئینان و پەروەردەکرنا زاڕۆکا و کارکرن ژ دەرڤەی مالێ د بوارێ چاندن و خودانکرنا گیانەوەران دا و پشکداریکرن د شۆڕەش و بەرخودانێ دا؟

ئەرێ چ تشتی وەسا ل ئافرەتا نوکه کرییە، ژ بلی گرنگیدان ب سەروبەرێ خو یێ ژ دەرڤە ئاگەهــ ژ هیچ تشتەکی نەمینیت و گرنگييێ ب لایەنێن دى يێن ژیانا خۆ يا دەروونی و ڕۆحی نەدەت؟

ئەرێ ئەگەر چنە و یا درست چییە؟

ب دیتنا من دڤان چەند سالێن بۆری دا هێدی هێدی، و پێنگاڤ پێنگاڤ هەول هاتنە دان ژ بۆ گوھۆڕینا هزروبیرێن ئافرەتێ بەرامبەر لەشێ وێ، چ ژلایێ سۆشیال میدیایێ ڤەبیت یان ژلایێ هندەک کەسێن بازرگان ڤهبيت، کو وەسا ل ئافرەتێ کرن بھايێ خۆ گرێدەت ب لەشێ خۆڤە.

ئەڤ چەندە بەرەڤ هندێ ڤەبر، ئەگەر هندەک تشتا نەکەت، دێ د لەشێ خۆدا بھایێ خۆ ژ دەست دەت، وەک گوهۆرینا سەروچاڤا و بەژنێ ب ڕێکا کرنا ھندەك جۆرێن نشتەرگەریا، تەنانەت ئەگەر یا پێدڤی ژی نەبیت. ئەڤ تشتە بو ئەگەر کو ئافرەت خۆ ببینیت وەک لەش و هەمی لایەنێن دی یێن خۆ یێن دەروونی و ڕوحی ژ بیربكەت، و بتنێ گرنگیيێ ب سەروسیمايێ خۆ بدەت تنێ دا یا خۆشتڤی بیت دناڤ جڤاکی دا و بهێتە ڕازیكرن ژلایێ زەلامی ڤە.

ئەڤێ چەندێ وەسا ل ئافرەتا کورد کرییە، ببیتە ئافرەتەکا ب سەرڤە جوان و ژناڤ دا ڤالا و بێ بیروباوەر و شکەستی.. و د ئەنجام دا ئافرەتا کورد ڕەسەنەیەتیا خۆ ژ دەست بدەت.

بازرگانیکرن ب ناسنامەیا ئافرەتێ ڤە

هەروەسا پالدانا ئافرەتێ بەرەڤ ڤێ كريارێ گەلەک کەس مفادارکرن، بگرە ژ بازرگانان و سەنتەرێن جوانکاری و هندەک نۆژدارێن جوانکاریێ. د نوکە دا و دناڤ جڤاکێ مە دا زۆرترین بازرگانی ب ئافرەتێ دهێتەکرن ژلایێ فرۆتنا کەل و پەلێن جوانکاریێ و نشتەرگەریێن جوانکاریێ و بویە ترێند و مۆدێل، و وەسا ل ئافرەتێ کریيە، کو ئەگەر ڤان تشتان نەکەت دێ یا بێ بھابيت و ناهێته ڕازيكرن د چاڤێن جڤاک و زەلامی دا.

ئەرێ د سەردەمێن باب و باپیرێن مەدا کەنگی ئافرەتا کورد یا ڕەسەن دهاتە پیڤەركرن ژلايێ لەشیڤه؟، کیش ئافرەت بێ هەڤژینی دما چونکی فلان جوانکاری نەکربوو، چونکی پیستێ وێ فلان ڕەنگ بوو، ئەرێ کەنگی ئافرەت ب تنێ دما ب لەشێ خۆ ڤە و هەمی تشتێن دی ژبیردکرن؟

ئافرەتا کورد یا ڕەسەن سەرەڕای کارکرن د ژورڤە و ژ دەرڤەی مالێ یا بێ بەهر نەبوو ژ جوانی و گرنگیدان بخۆ و لەش و ساخلەمیا خۆ، ل وی دەمی ئافرەت نەدهاتە کێمکرن ژ ئەگەرێ پیستێ وێ یان لاوازی و بێھێزیا وێ، هەمی ئافرەتا ڕێزا خۆ دناڤ جڤاکی دا هەبوو و وەك كچەكا ئاسايى دهاته پێشچاڤ بێ كو چ كەسەك ب كێماسى بەرێ خۆ بدەنێ.

بەرەڤ کیڤە؟ و ڕێکارێن درست چینە؟

ئەرێ جڤاکێ مە بەرەڤ کیڤە؟ هەتا کەنگی بازرگانییێ ب ئافرەتێ بکەین؟ هەتا کەنگی باوەری و بھايێ وێ گرێدەین ب لەشێ وێ ڤە؟ ئەرێ ما ئافرەت ب تنی لەشە یان ڕوح و حەزه بەری لەش بیت؟ ئەرێ ھەتا کەنگی ئافرەت بهێتە پشتگوهـ هاڤێژتن ژبەر لەش و سەروبەرێ وێ و بهێتە نەچاركرن بچیت دەستکاریەکا نە پێدڤی د خۆدا بکەت دا ب تنێ بهێتە قەبولکرن؟

ئافرەت یا پێدڤی ئاڤاکرنا خۆیە ژلایێ دەروونی و ڕوحی، پاشی لەشی ڤە. بھايێ ئافرەتێ گرێدای نینە ب جوانی و لەشێ وێ ڤە، بھايێ وێ گرێدایە ب هەبوونا وێ ڤە، ئافرەت مرۆڤە بەری ببیتە ئافرەت، ئافرەت ڕوحە بەری ببیتە لەش.

پێدڤیە هەر ژ زارۆکینيیێ دا کچ بهێتە فێرکرن کو باوەری ب خۆ هەبیت و بەرێ خۆ نەدەته خۆ وەک لەش ب تنێ و بھايێ خۆ گرێنەدەت ب لەشێ خۆ ب تنێ ڤە و لەشێ خۆ قەبول بکەت و حەژێ بکەت د سەر هەر کێم و کاسیەکێ ڕا، و بهێتە فێرکرن کو گرنگیيێ ب هەمی لایەنێن خۆ یێن ڕوحی و دەروونی و لەشی بدەت و هیچ تشتەک نەبیتە ئەگەر وێ بێ هێز و بێ بھا بکەت.

دڤێت ئەم ئافرەتەکا بهێز ئاڤابکەین ژ هەمی لایانڤە، چونکی ئافرەت نیڤا جڤاکی یە و نیڤا دی ژی ئەو دئینیتە دنیایێ.