زەلامەکێ بیانی، دا کو تورەییا خۆ بشکێنیت پتر ژ هزار کیلۆمەترا پیادە چوو، دا چ ئاریشە و گرفتا د خێزانا خۆ دا چێنەکەت.

زەلامەکێ ئەورووپی چو مال، ئەو و خێزانا خۆ ب شەڕ چوون. هەڤژینا وی گەلەک قەرەبالغ کر، پت‌پت و قێژقێژ کر. زەلامێ ئەورووپی هندی هات هەڤژینا خۆ ئارام بکەت نەشیا، نەچار بوو ژ مال دەرکەفت و ژ قەهران دا ب ڕێڤە چوو. پتر ژ هزار کیلۆمەترا چوو، هەتا هشێن وی زڤڕین و قەهرا وی شکەستی و جارەکا دی زڤڕی مالێ. زەلام تێگەهشتبوو کو ئەگەر ل مال بمینیت دێ ئاریشە مەزنتر لێ هێت، یان دا هەڤژینا خۆ قوتبایە یان دا بەردابایە؛ دا کو چ پەرچەکردارەکا (رد فعل) بلەز نەوەرگریت ژ مال دەرکەفت.

دەما هاتیا مالێ، هەڤژینا وی یا ئارام بووی، مال یا تەنا بووی و چ پت‌پت و قەرەبالغ نینن. ڕۆنشتە خوارێ و سەرهاتیا خۆ بۆ هەڤژینا خۆ ڤەگێڕا و گۆتێ:

«تە چ ڕێک بۆ من نەهێلان و تەنگاڤ بووم، دا گەلەک نەخۆش بیت؛ یان دا تە قوتم یان دا تە بەردم و ئەڤ مالە دا خراب بیت. تنێ دا خێزانا مە ژ ناو نەچیت من ئەو ڕێک هەڵبژارت، کو دوور بکەڤم ژ مالێ دا کو قەهرا من بشکێت و ئارام ببم و چ بڕیارێن خەلەت نەدم. هەر بڕیارەکا بلەز تۆ بدەی دێ پەشێمان بی و ب دەیان سالان چارەسەر نابیت.»

دیاردا توندوتیژیێ د جڤاکێ ڕۆژهەڵاتی دا

بهێنفرەهی و دوورکەفتن دەمێ ئاریشە، قەرەبالغی، و توندوتیژیا خێزانی دا، ڕێکەکا دروستە دا کو خێزان نەهەڕفیت و ئارامی بکەڤیتە د ناڤ مالێ دا.

مخابن د جڤاکێ ڕۆژهەڵاتی دا ژ ئەگەرێن توندوتیژی و تورەبوونێن خێزانی، سالانە سەدان هەڤژین و کچ دهێنە کوشتن ژ بەر تورەبوونا ناڤ مال و خێزانێ، و سەدان هەڤژین ژ ئێک دهێنە بەردان ژ ئەگەرێن تورەبوون و بهێنتەنگیێ.