شۆڕەشا ١١ی ئەیلولێ مەزنترین گوهۆڕینا مێژوویی بوو د دیرۆکا هەڤچەرخا کوردان دا ل ژێر سیبەرا سەرکردایەتییا ژیرمەندانە یا «بارزانیێ نەمر». دەمێ دەستهەڵاتا عەبدولکەریم قاسم پەنا بریە بەر تاکڕەویێ و قەیرانێن پێکهاتەیان ب ڕێکارێن لەشکەری چارەسەر کرین، بنەمایێن متمانەیا دەستووری هەڕفین. ڕاپەڕینا ئەیلولێ نە یاخیبوون بوو ل دژی یاسایێ، بەلکو دەرئەنجامێ بێئومێدییا میللەتەکی بوو ژ چارەسەرییا سیاسی د دەولەتەکا مەرکەزی دا.

دەستهەڵاتدارێن رژێمێ ل وێ راستیێ نەگەهشتن کو کەرب و کین، خۆسەپاندن، بندەستکرنا گەلان و ڤەدەرکرنا سیاسی ب ستوونا پێکڤەژیانێ ناهێنە ڕاگرتن؛ بەلکو ئەڤ سیاسەتە ڕێخۆشکەرێ تێکچوونا شەمالکا ئارامیێ و خۆشەویستیێ یە د ناڤبەرا نەتەوەیان دا.

هەڤڕکییا ناڤنەتەوەیی و گوهۆڕینا دۆزا کوردی بۆ پرسەکا جیهانی

ل سەردەمێ جەنگێ سارد دا و د گۆڕەپانا هەڤڕکییا د ناڤبەرا مۆسکۆ و واشنتۆن دا ل سەر ڕۆژهەڵاتا ناڤین، ڕژێما ئیراقێ کوردستان کربوو کایە و مەیدانا بەرژەوەندیێن خۆ یێن دویر ژ هەمی ڕەوشت و تیتالێن مرۆڤایەتیێ.

د ڤی چارچۆڤەی دا، «بارزانیێ نەمر» و سەرکردایەتییا شۆڕەشێ ب ژیرمەندانە و واقعیانە هەمی تابلۆیێن پاشڤەمای ب هەناسەیا ئێکگرتنێ ژ جڤاکەکێ دابەشبووی هەلکێشان؛ ژ ناڤ جەرگێ بێبەختییا دیرۆکێ هیڤیێن مری برنە ئەڤرازێن زیندی، و دۆزا کوردی ژ کێشەیەکا ناڤخۆیی ڤەگوهاست بۆ پرسەکا نێڤدەوڵەتی. شۆڕەشێ چەمکێ رەوایییا توندوتیژییا دەولەتێ چەماند، و بەغدا ئێدی نەشیا خۆ وەک تاکە نوێنەرێ سەروەرییا سیاسی ل ئیراقێ بێی کوردان پێناسە بکەت. تەڤگەرا ڕزگاریخوازا کوردی سەلماند کو پرسا مللەتەکی ب قەرەبووکرنێن ئابووری ناهێتە کڕین، و سەروەت و سامان نکارن سەرکردێن ئازا بهەژینن.

ڤەهاندنا هەبوونێ ژ کالکێن نەمانێ و ڕێککەفتنامەیا ١١ی ئادارێ

د شەڤەنگێن ڕۆژەکا بێڕەنگ و بێدەنگ دا، شۆڕەشێ و بارزانی ڕژێم ژ سەرکەفتنا سەربازی بێهیڤی کر، و بەغدا نەچار بوو بەژنا خۆ بۆ ڕێککەفتنامەیا ١١ی ئادارا ١٩٧٠ێ بچەمینیت و ئیمزا بکەت و دان ب مافێن دەستووری یێن کوردان بنێت.

ئەڤ بەڵگەنامەیە نە بتنێ ئاگربەستەک بوو، بەلکو سەرکەفتنەکا دەستووری یا بێوێنە بوو؛ تێدا ئیراقێ ب فەرمی دان ب هەبوونا نەتەوەیا کورد کر وەک هەڤپشکەکێ نیشتمانی، و زمانێ کوردی بوو زمانێ فەرمی یێ دەڤەرێن کوردستانێ د کایێن خواندن و دادگەهان دا. ئادارێ سەلماند کو ئیرادەیا کوردان ب ئاگربارانا تۆپخانەیان ناهێتە ژناڤبرن و کپکرن.

ئەیلول دەنگ و هاوارێن میللەتەکی بوو ل هەمبەر زۆرداری، نەمەردی و هۆڤاتییا دەستهەڵاتدارێن خۆپەرێس، پشتی چەندین ساڵێن درێژ ژ کوشتن، زیندانیکرن و سەپاندنا زمانێ عەرەبی. پێشمەرگەی ب تفەنگا خۆ، هەڵبەستڤانان ب هەڵبەستێن خۆ، ڕەوشەنبیران ب پێنووسێن خۆ، میللەتی ب خۆڕاگرییا خۆ، و «بارزانیێ نەمر» ب سەروەری و پێشەنگایەتییا خۆ، کورد ب میللەتبوون و ئێکگرتنێ دویر ژ ئێل و عەشیرەتگەریێ قەڵەمدان. دار و بەردان، دەشت و چیایان د ناڤ چارده‌ پاییزێن سەخت دا یەک ڕێک و یەک ئاواز هەڵبژارد: «یان کوردستان یان نەمان».