پێزانین ل سەر دارا تزبەح

• • ناڤێ کوردی: دارا تزبەح، دار تزبەحوک
• • ناڤێ عەرەبی: سبحبح
• • ناڤێ ئینگلیزی: Chinaberry tree, Umbrella tree
• • ناڤێ زانستی: Melia azedarach

• وەڵاتێ وێ یێ ڕەسەن یان ل کیرێ بەڵاڤەبوویە: باشوورێ ڕۆژهەلاتا ئاسیا و باکوورێ ئۆستورالیا.

• سەر ب خێزانا (Family: Meliaceae): دارەکا بەلگ وەرینە، ڕەنگێ بەلگێن وێ د کەسکن و بەلگێن وان بەرامبەری ئێکن. ب شێوەیەکێ گشتی، بلنداهییا ڤێ دارێ نێزیکی (١٢) مەتران دچیت، ئەگەر د ژینگەهەکا گونجایدا بیت. کەزاختن د وەرزێ پاییزێدا بۆ ڤێ دارێ یا باشە داکو گەشا وێ باشتر لێ بهێت و ب هێز ب کەڤیت. ئەگەر گەشا وێ یا باش بیت و قەبارێ وێ یا مەزن بیت سیبەرەکا مەزن ددەتە دەوروبەرێن خۆ. یا باش ئەوە ل دوماهیا وەرزێ بهارێ قورمێ ئەڤێ جۆرێ دارێ بهێتە بۆیاغکرن ب بۆیاغا تایبەت یا داروباری و بهێتە تێکەلکرن دگەل قرکەرەکێ کەروو و بەکتری و یێ مێش و موران، داکو یا پاراستی بیت ژ ئاتافێن زیانێ بگەهینێ، سەرەرای هندێ ل دوماهیا وەرزێ زڤستانێ بهێتە پەیین کرن، داکو گەشا وێ یا باش بیت بۆ وەرزێن داهاتی. دارا تزبەح دارەکا ب بەرگرە دژی سەقایێن نەگونجای.

• گەشەکرنا وێ: یا بلەزە.

• بەرگری: بەرگریا گەرمێ و سەرمایێ دکەت.

• کۆلیلک و تۆڤ: د وەرزێ بهارێدا کۆلیلکان ب ڕەنگێ مۆر سەر ب ڕەنگێ سپیڤە ددەن، و د وەرزێن هاڤینێ و پاییزێدا تۆڤی ددەت و شێوەیێ وان یێ گرۆڤرە و قەبارێ وان نێزیکی (١) سەنتیمەترە.

• زێدەکرن: ب رێکا تۆڤی و قەلەمان دهێتە زێدەکرن.