د جیهانا ئەڤڕۆ دا، گوهۆڕینێن بلەز یێن تەکنەلۆجی و ئابووری سەلماندیە، کو رێكێن جاران یێن سەرکەفتنێ ئێدی كاريگەریا جاران نەماینە. بۆ ماوەیەکێ درێژ، د جڤاکێ مە دا هزر دکر، کو تنێ باوەرناما زانکۆیێ و دامەزراندنا میری کلیلا پاشەڕۆژەکا ئارامە. بەلێ راستی یا مە د هەژینیت ئەوە، رێژەکا مەزن یا گەنجێن مە یێن دەرچووی بێ کارن، و ژنێن خودان شیان د مال دا بێ دەلیڤە ماینە.

پسیار ئەڤە یە، ئەرێ دڤێت ئەم یێن چاڤەڕێ بین، یان دەمێ وێ هاتیە ئەم بخۆ دەلیڤێن کاری بخۆ دروست بکەین؟

بێگومان، چارەسەری د دەستێ مە بخۆ دایە. ئەڤڕۆ، پڕکرنا ڤالاهیێ د ناڤبەرا بێکاریێ و سەرکەفتنێ دا ب رێیا دوو چەکێن بهێز دبینین، فێربوونا کارامەییێن پیشەیی و کارسازییا دیجتالێ.

چارەسەری و هەنگاڤێن سەرەکی

1. گوهۆڕینا هزر و تێگەهشتنێ بۆ کارێ دەستی و تەکنیکی:
   پێدڤی یە جڤاکێ مە تێگەهشتنا خۆ بۆ کار و پیشەیان بگوهۆڕیت. کارێ دەستی، تەکنیکی و هونەری نە کێماسی یە، بەلکو داهێنان و نیشانا خودان باوەریێ یە. گەنجێن مە ل شوینا چاڤەڕێکرنا چوونە سەر کاری، فێری زمانەکی بەرنامەسازییەکێ، ریکلامکرنێ، یان کارەکێ دەستی یێ جوان دبن، یێن ئاڤا هاتی و خودان پاشەڕۆژ ب خۆ دبن. هەر کارەکێ بچووک بناغێ کارسازییەکا مەزنە.
2. سۆشیال میدیا: بازارێ جیهانی د بەڕیکێ دا:
   جاران پێدڤی ب دکانەکا مەزن و سەرمایەیەکێ زۆر هەبوو، دا کو مرۆڤ کارێ خۆ دەستپێبکەت. بەلێ ئەڤڕۆ، ب تنێ ب رێیا تلەفۆنەکێ و پەیجەکێ ل سەر ئینستاگرام، تیکتۆک یان فەیسبووکی، هەر داهێنەرەک دشێت بەرهەمێن خۆ پێشکەش بکەت.
   چ جوداهی نینە ئەگەر کارێ تە چێکرنا گول و دیاریێن خەملی یێن دەستی (وەک کرۆشێ)، نڤیسین و زمان یان هەر شیانەکا دی یا هونەری بیت سۆشیال میدیا باشترین دەلیڤەیە، دا کو بەرهەمێ خۆ بگەهینیە مال ب مال و باژێر ب باژێر.
3. دروستکرنا جڤاکەکێ پشتەڤان:
   ئەم پێدڤی ب سیستەمەکێ پشتەڤانیێ نە د ناڤ جڤاکێ خۆ دا. رێکخراو، کۆمەڵگەهـ و کەسێن خودان ئەزموون دڤێت ببنە پر، گەنج و ژنێن خودان کارامەیی بێخنە سەر رێکا دروست. پێدڤی یە وۆرکشۆپ و خولێن تایبەت ب رێڤەبرنا کارێن بچووک، دیارکرنا بهایێ بەرهەمان و چەوانیا مارکێتینگێ بهێنە ڤەکرن، دا کو کارێ وان یێ ل سەر پەیجان ب رێکوپێکی و پرۆفێشناڵ بەردەوام بیت.
4. سەربەخۆیا دارایی یا ژنان: بهێزکرنا بنەمایێ جڤاکی:
   دەمێ ئەم دەلیڤێ بۆ ژنێ دروست دکەین دا کو ببیتە خودان کارێ خۆ و ژ روویێ دارایی ڤە سەربەخۆ بیت، ئەم تنێ پشتەڤانیا تاکە کەسی ناکەین. بەلکو ئەم پاشەڕۆژا خێزانەکێ و جڤاکەکێ بهێزتر دکەین. ئابوورێ بهێز یێ ژنێ ئابوورێ داهاتیێ کوردستانێ یە.