دگەل دەنگێ بانگێ سپێدێ، من و هەڤژینا خۆ چاڤێن خۆ ل ڕۆژەکا نوو ڤەکرن. هێشتا تاریاتیا شەڤێ ب تەمامی نەڕەڤیبوو دەمێ وێ کەل و پەلێن گوندی بۆ من بەرهەڤدکرن، و من ژی ب ئاڤا سار یا سپێدێ گەرماتیا خەوێ ژ چاڤێن خۆ دڕەڤاند. پشتی من بەژن ل بەرامبەر خودێ بۆ نڤێژێ چەماندی، من بارێ خۆ کرە د ترومبێلێ دا و بەرێ خۆ دا گوندی.

ئەز گەهشتم و ڕۆژ ژی ب تەمامی هەلاتبوو. ئەز د ناڤ جەرگێ بیستانێ خۆ دا ب تەمامی نوقمی کێلانێ ببووم؛ دیمەنەک بوو کو تنێ ئەز و ئاخ و دەنگێ گڕان یێ تەڕەکتۆرێ تێدا بووین، دەنگەکێ وەسا بلند کو ئەز ژ هەمی دونیایێ دابڕیبووم.

ژ بەر قۆڕەقۆڕا بلند یا تەڕەکتۆرێ من ئاگەهـ ژ دونیایێ نەبوو، حەتا کو چاڤێن من ب چۆیچکەکا بچووک کەتین. ب پەڕ و بالێن خۆ یێن ڤەکری، خۆ کربوو بەربەستەک ل بەر تائێرێن مەزن یێن تەڕەکتۆرێ! ئەز د جهێ خۆ دا ڕاوەستیام؛ من نەدزانی کێشە چییە و بۆچی ئەڤ باڵندا بچووک دژبەریا ڤی زەبەلاحێ ئاسنی دکەت؟ ما تشتەک هەیە ل سەر ڤی عەردی هێژای هندێ بیت مرۆڤ یان گیانەوەرەک خۆ بکەتە قوربانی؟