کوچبەریا مێشکان

دەمێ ئەم گوھ ل پەیڤا "کۆچبەریا مێشکان" دبین، ئێکسەر هزر د وێ زیانێ دا دکەین، چونکی مە گەلەك گەنجێن ژیر، داهێنەر و بسپۆرێن باش د بوارێن جودا جودا دا ژ دەست داینە و چۆینە دەرڤەی وەلاتی. بەس ئەرێ ڕاستی ئەوە کو هەردەم ئەڤ کۆچبەریە زیانە؟ یان ئەم دشێین ب ڕێکا ئنترنێت و تەکنۆلۆژیایێ ڤێ غەریبیێ بکەینە دەرفەتەک بۆ پێشخستنا وەلاتی؟

ئەڤڕۆ گەنجێ مە یێ ل دەرڤە—چ ل ئەوروپا بیت یان ل هەر وەلاتەکێ دی یێ پێشکەفتی—نە ب تنێ کۆچبەرە، بەلکو ئەو نوێنەرێ دەنگ و کلتورێ مەیە. گەلەک ژ وان سەرکەفتنێن مەزن د ناڤ زانکۆ و کۆمپانیێن دەرڤە دا بدەستڤە ئیناینە، و د بوارێن کارگێری، تەکنۆلۆژیا و زانستی دا کارێن بەهێز دکەن. تشتێ جوان ئەوە کو دلێ ڤان گەنجان هەردەم ل گەل مەیە و حەز دکەن کارەکی بۆ وەلاتی خۆ بکەن، بەلێ گەلەك جاران نزانن ب چ ڕێک و چەوان دەست پێ بکەن.

پێنگاڤێن سەرەکی بۆ مفاوەرگرتنێ ژ زانست و ئەزموونا گەنجێن دەرڤە

بۆ هندێ کو ئەم مفایەکێ ڕاستەقینە ژ ئەزموون و سەرکەفتنا ڤان بەهرەمەندان وەرگرین، چەند پێنگاڤێن بساناهی هەنە کو دڤێت کاری ل سەر بکەین:

1. دیوانا زانستی یا سالانە: ئەنجامدانا کۆنگرەیەکێ سالانە ل کوردستانێ ب پشکداریا کەسێن خودان شیان یێن ل دەرڤە. ب تنێ هاتنا وان و پشکداریا وان د دیوانێن زانستی و جڤاکی دا، دێ هێزەکا مەزن دەتە گەنجێن مە و هاندانا وان دکەت.
2. ڤەگوهاستنا ئەزموونا کاری: ئەو گەنجێن مە یێن د بوارێ بڕێڤەبرنا کاران و بازاڕی دا شارەزایی ل دەرڤە پەیدا کری، دشێن ل سەر ئەنترنێتێ خول یان وورکشۆپان بۆ گەنجێن مە یێن ل ڤێرێ ڤەکەن، دا کو فێری ڕێکارێن نوی یێن کار و پروژەیان ببن.
3. دروستکرنا تۆڕەکا پەیوەندیێ: گەلەکا فەرە ئەگەر کەنالەکێ فەرمی یان تۆڕەک هەبیت کو ناڤ و بسپۆریا گەنجێن ژ دەرڤە ل بن سیبەرا نەتەوەیی کۆم بکەت، دا کو هەر دەمێ وەلاتی پێدڤی ب هاریکاریا زانستی هەبوو، ب سەناهی ل دویف بسپۆریا وان پەیوەندی پێ بهێتەکرن.
4. سەنتەرێن وەرگێڕان و ڤەگوهاستنا زانستی (پەرتۆکخانا زانستی یا ئەلیکترۆنی): دروستکرنا پلاتفۆرمەکا ب ساناهی کو تێدا زانست، بابەتێن وەرگێڕای و پەرتۆکێن داهێنانێ هەبن. ژ بەر کو زمانێن بیانی و ب تایبەت زمانێ ئینگلیزی بوویە زمانێ زانستێ ئەڤڕۆ، گەلەک ژ گەنجێن مە ل ناڤخۆ ب زەحمەت گەهشتنا ب زانیاریێن نوی هەیە. گەنجێن مە یێن ل دەرڤە دشێن ب ڕێکا وەرگێڕانا کورتە بابەت و ڤەکۆلینێن زانستی یێن نوی بۆ زمانێ دایکێ، مفای بگەهیننە تێگەهشتنا گەنجێ ناڤخۆ د هەمی بواران دا، ب تایبەت بوارێن کار و تەکنۆلۆژیایێ.
5. سندۆقێن وەبەرهێنانا هەڤپشک: ئاڤاکرنا سندۆقەکا دارایی یا بچووک کو بسپۆر و بازرگانێن کورد یێن ل دەرڤە پشکدار ببن تێدا، بۆ دابینکرنا سەرمایەیێ دەستپێکێ بۆ پشتەڤانیکرنا پروژێن بچووک و هزرێن نوی یێن گەنجێن مە ل ناڤخۆ.
6. خەلاتێ سالانە یێ (مێشکێن داهێنەر): ڕاگەهاندنا خەلاتەکێ نەتەوەیی بۆ هاندانا وەلاتێن ژ دەرڤە دژین کو پتر خزمەت و دەستکەفتان ب ڕێکا زانست و پروژەیان بگەهیننە وەلاتی. ئەڤە دێ دلسۆزیا وان پتر لێکەت و پەیوەندیا وان ب ئاخا نیشتمانی ڤە بەهێزتر کەت.