ل ئێڤارەکێ..
ئەردی…
چیرۆکا کەنیێ ڤەدگێرا و
جار ب جار گازی دکر
مریێن لبن ڤێ ئاخا من ..
جلێن ڕەش ل خوە بکەن
ڕوویێ کەنیێ هاتە سوتن
ئێدی هەمی هەست
دوێ ژوورا تژی ژ
ئاگرو پەلو گوری
یێ بێهن دکەنە مرنێ

بەدبەخترین هەست خوەشیە…!
جلکێن سێوییەکێ لبەر خوە دکەت
کو بۆ هەتا هەتایێ
بێهنا دایکێ ناس نەکەت
بەریکێن بایی جار د ڤالابوون
جار ژی تژی بوون
ژ ترسێ…!
ژ شەرمێ…!
ژ ڕۆندکەکێ …!
کو بۆ جارەکێ ژی
ئەردی ژ خوە تەر نەکەت

کەنی ژبۆ هەوە هەستەکە
لێ …
ژبۆ من کچەکا تژی ژ ئازارێ
و ڤالا ژ ئەشقێ بوو

گەلو…
گونەهـ ژ کێ یە!
گەر ئێدی
مرییەک لبن ڤێ ئاخێ
شەرم ژ ڕوویێ وێ بکەت
گەلو…
ژبلی سۆتیێن جەگەرێ
کی خوە ل مرنا ڤی هەستی
خوەدی دکەت ..!؟

کیژان بابە …
ڤێ جەگەرێ ژخوە ئێتیم دکەت
کیژان پەیڤە..
د کراسێ غاسلەکێ دا
ڕوویێ کەنیێ ب ئاڤا بێگونەهیێ
هێدی هێدی تەر دکەت..