گرنگیا هەبوونا لشکرەکی دەستهەل ب چەکێن سەردەم و ئالیکاریا مەعنەوی یا وەلاتێن جیهانێ بۆ هەرێما کوردستانێ، دێ بیتە ئەگەڕێ دابینکرنا چەندین دەستکەفتێن سیاسی و ئەمنی بۆ هەرێما کوردستانێ، هەروەسا دێ بیتە ئاماژەکا ئاشکرا بۆ وەلاتێن جیرانێن هەرێمێ، کو ئێدی بەهانەیان ل دور بەزاندنا سنوران ژ لایێ ڕێکخراوێن چەکدار ڤە، ل هەرێما کوردستانێ نەگرن.

ل پتریا وەلاتێن جیهانێ، لشکرەکی دەستهەل و ئامادە ب دەستپێشخەریێن لشکری یێن سەردەم، کارێ پێشینە یێ دەستهەلاتداریا وان وەلاتانە، چونکی نە بتنێ لشکر ئەگەڕێ پاراستنا ئاڤ و خاک و ئاسمانێ هەر وەلاتەکییە، بەلکو هندەک لشکرێن وەلاتێن جیهانێ بووینە ناسنامە ژی بۆ وەلاتێن خۆ.

مادەم هەرێما کوردستانێ خودان سنورە دگەل هندەک وەلاتێن دی یێن خودان سەروەری، حکومەتێن ئێک لدووڤ ئێک یێن هەرێمێ بزاڤ یا کری؛ لشکرەکی دەستهەل و ئامادە ب دەستپێشخەریێن لشکری ژ هەمی هێزێن پێشمەرگەی ل ژێر چەتریا وەزارەتا پێشمەرگەی پێکبینیت، دا کو ببیتە هێزا پاراستنا ئاخا هەرێما کوردستانێ و وەلاتییێن وێ، زێدەباری ئاڕاستەکرنا پەیامەکێ بۆ وەلاتێن جیران کو هەرێما کوردستانێ دشێت سنورێن خۆ دگەل هەوە بپاریزیت و نەهێلیت چ هێز و ڕێکخراوەکا چەکدار ل ناڤخۆیا وێ زیانێ بگەهینیتە سەروەریا هەوە.

گرنگیا دەستهەلیا هێزا پێشمەرگەی بۆ جڤاکێ نیڤدەولەتی

ل سالا ٢٠١٤ێ، ل سەردەمێ شەڕێ دگەل تیرۆریستێن داعش، دەستهەلی و گرنگیا هێزێن پێشمەرگەی بۆ جڤاکێ نیڤدەولەتی دیاربوو، ب تایبەتی بۆ هێزێن هەڤپەیمانیا نیڤدەولەتی، هەتا گەهشتییە وی ئاستی کو ئەو وەلاتێن کاریگەری ل ناڤ هەڤپەیمانیێ هەئی، لیژنەیەکێ پێکبینن بۆ پتر ڕێکخستن و ئامادەکرن و چەکدارکرنا پێشمەرگەی ل ژێر چەتریا وەزارەتا پێشمەرگەی، هەتا ئەو باوەری بۆ چێبووی کو ڕێککەفتنامەیێن دوور مەودا دگەل حکومەتا هەرێما کوردستانێ گرێدت بۆ پرچەککرنا هێزێن پێشمەرگەی.

گرنگیا دەستهەلیا هێزێن پێشمەرگەی بۆ جڤاکێ کوردستانی

ل سەردەمێن بورین، سەرکردایەتیا شۆڕشێن کوردی، پێشمەرگە بۆ ڕزگارکرنا ئاخا کوردستانێ و مرۆڤێ کورد ژ بندەستیێ هاتبوو پێکئینان. لێ، نوکە پێشمەرگە بۆ پاراستنا ئاخا کوردستانێ و مرۆڤێ کورد و هەرێما کوردستانێ یێ دهێتە ئامادەکرن.

پێشمەرگە وەکی کەس، و یەکە وەکی بنگەهـ، چەند د دەستهەل و موکۆم بن، دێ وەلاتییێن هەرێما کوردستانێ پتر ئارام بن و کارێن خۆ یێن ڕۆژانە ب ئارامی جێبەجێکەن، هەروەسا وەختێ وەلاتییێن هەرێما کوردستانێ دبینن پێشمەرگە ئەو هێزە یا کو سەر و مالێ وان دپارێزیت، بێ دوودلی ئەو ژی ل تەنگاڤیان دێ خۆ وەکی پێشمەرگە بینن و ب ڕۆلێ خۆ ڕابن، هەر وەکی مە ل شەڕێ داعش دیتی چاوا وەلاتییێن سیڤیل ڕۆژانە بۆ پێشکێشکرنا هاریکاریێن ماددی و مەعنەوی دچوونە بەڕۆکێن شەڕی دا کو ورەیا پێشمەرگەی بلند بکەن.

گرنگیا هەبوونا پشتیڤانیا نیڤدەولەتی بۆ هێزا پێشمەرگەی

د شەڕێ پاراستنا هەرێما کوردستانێ دا ژ هێرشێن ڕێکخراوا تیرۆریستیا داعش ل سالا ٢٠١٤، هێزا پێشمەرگەی بوو جهێ باوەریێ ل نک پتریا وەلاتێن دیموکراتی ل جیهانێ، ب تایبەتی ژی ل نک وەلاتێن هەڤپەیمانیا دژی داعش و وەلاتێن هەرێمێ، لەورا هەر ئەو باوەری بوو ئەگەڕ کو ل ٢٢ی ئۆکتۆبەرا سالا ٢٠١٤ ل سەر داخوازا سەرۆکێ هەرێما کوردستانێ ڕێزدار مەسعود بارزانی پەڕلەمانێ کوردستانێ بڕیارا چوونا پێشمەرگەی بۆ باژێڕێ کۆبانیێ پەسەند بکەت، هەر ئەو باوەریا وەلاتێن جیهانێ بوو ئەگەڕ کو ڕێ ب پێشمەرگەی بهێتە دان وەکی لشکرێ (هەرێمەکا فیدرال) سنورێن جیۆسیاسی یێن سێ وەلاتان دەرباز بکەت و بگەهیتە باژێڕێ کۆبانیێ و پشتی ١٣٤ ڕۆژێن شەڕێن گران ل دژی داعش، سەرکەفت و نەهێلا ئەو باژێڕ بکەڤیتە دەستێن تیرۆریستان.