دایکایەتی ئەرکە نە منەتە

من ئەو ب هەمی حەژێکرن، سەبر و قوربانیدانێن خۆ مەزن کرینە، نە ژ بەر کو ئەز خودانا ژیانا وان بم، بەلکو ژ بۆ کو هێز و باوەریێ ب خۆ بدەمە وان، دا بشێن ژیانا خۆ ب دەستێ خۆ ئاڤا بکەن، د خواندن و کارێ خۆ دا سەرکەفتی بن، و د ژیانا هەڤژینیێ دا دلخۆش و ئارام بن.

کچێن من موڵکێ من نینن، بەلکو ئەمانەتەکن خودێ داناینە د دەستێ من دا، و رۆژەکێ ئەز دێ ل سەر ڤێ ئەمانەتێ هێمە پرسیارکرن.

ئەرێ من ئەو حەژێکرن دایێ یا پێتڤی بو بدەمێ؟ ئەرێ من د هەمبێز کرینە و دلوڤانیا خۆدا؟ ئەرێ ئەز بۆ وان جهێ ئارامی و پشتەڤانیێ بویمە؟ ئەرێ من هاریکاریا وان کریە دا ببنە ژنێن بهێز، سەربەخۆ و دلخۆش؟

من نەڤێت کچێن من ژ بەر فەرزێ یان هەستکرنا گونەهێ ل نێزیکی من بمینن، بەلکو من دڤێت ئەو ب حەزا خۆ نێزیکیا من هەلبژێرن، چونکی ل دەڤ من حەژێکرن، ئارامی و ئەمانەت دیتیە و دبینن.

ئەز باوەر دکەم کو ئەو دایکا حەژێکرنێ ل شوینا ترسێ، رێزگرتنێ ل شوینا کۆنترۆلکرنێ، و باوەریێ ل شوینا سنووردارکرنێ د دلێ کچێن خۆ دا بچینن، دێ پەیوەندیەکا جوان و بهێز ل گەل وان ئاڤا کەت، یان ب دوماهیک هاتنا پەروەردەکرنێ دوماهی ناهێت.

دبیت ژیان وان ژ من دویر بێخیت، و هەر ئێک ژ وان ب ژیان، خێزان و خەونێن خۆ ڤە مژویل ببیت، لێ حەژێکرنا د ناڤبەرا مە دا دێ هەر مینیت حەزژێکرنەکا نە پێتڤی ب زۆریێ هەیی، و نێزیکیەکا نە پێتڤی ب داخوازکرنێ هەیی.

دایکاتی بۆ من ئەو نینە کو ئەز کچێن خۆ مەزن بکەم دا بۆ من بژین، بەلکو ئەوە کو ئەز وان مەزن بکەم دا ژیانا خۆ ب دلخۆشی بژین، و هەردەم بزانن کو دایکەکا وان هەیە، بێ مەرج حەز ژ وان دکەت، دەرگەهێ وێ هەردەم بۆ وان ڤەکریە، و دلێ وێ هەر چەند ئەو مەزن ببن ژی بۆ وان جھ هەیە.