ژینا من خەم و دەردەسەرینە،
رۆژێن من تەحل و خۆلیسەرینە.

چەندی ئەز کەنیم، پاشی ئەز گریام،
چارەنڤیسی گۆتی: «تەنێ مام».

شەڤ هەتا سەحەر رۆندک هەڤالن،
جەرگ و دلێ من بێ دەنگ دنالن.

هەر کەس هات و گۆت: « ل گەل تە دامە»،
پشتی دەمەکی پاشدا هێلامە.

بۆچی ئای ژیان... بۆ ڤێ سزایێ؟
من گونهە چییە ل ڤێ دنیایێ؟

ئەگەر گریا من دەنگێ دلی بیت،
ژان و کۆڤان و جەرگ هلهلی بیت.

گوهێ خۆ بدێ، دەریا ژی ژارە
ژ رۆندکێن من هەر شەرمەزارە.

هزرا دایکا من هێژ کەنیا منە
نزانیت ئەڤە هەر مرنا منە.

ل سەر برینا، برینەک هەیە
ل ژیانا مندا خەم میراتەیە.

ئەگەر رۆژەکێ چەپکەکێ گولان
ل سەر گۆڕێ من بیرهاتن دانان

نەبێژن نڤست، بێژن خەم نەمان
لێ دوماهی هات، ڤیان و ژیان.

ئەز بەری مرنێ، مربووم هزار جار
ب ناڤێ ژیانێ، من خواربوون ئازار.