ژڤان

سەرێ چەند سالا بوو، دڤیا بچیتە دیدارا وی، لێ ترسێ و شەرمێ داگیرکربوو، و رویێ وی نەدگرت ل بەرامبەر ب راوەستیت و بەرێ خوە بدەتە چاڤێن وی. هەرجار ب بەهانەکێ و هێجەتەکێ رێکا خوە دگوهاڕت و دیدار پاش دئێخست؛ هەر چەندە نە زێرەڤانەک لبەر دەری بوو رێکێ ل بگریت، نە ژی سکرتێرەک هەبوو ژڤانەکی ژێ وەرگریت، لێ دیسا نە دشیا بچیت و ل دیدارا وی ب روینیت، داکو وێ دویراتیا هندە سالان بشکێنیت، و جارەکا دی بیرا وی ل روژێن زاروکینیێ بینیت و وان سوزێن داینە ئێک.

هەتا روژەکێ ژ نیشکانڤە خوە ل بەر سینگی دیت. بێ ئاخفتن کانیکا رۆندکا ژ چاڤێن وی زا، و رۆندکێن وی بوونە باران و ل سەر دێمێ وی بارین. وژدانا وی خۆ د روحا وی ئالاند و هەمی چیڕۆک ب بێدەنگی د بیردانکا ویدا هاتن و چوون. ژیانا وی ل بەرچاڤا بو دیکیومێنتەکا تراژیدیا ب ژان، پشتی ل بەر خودیکێ دێمێ خوە دیتی... و ئەو ژڤانێ هندە سالا نە د وێریا بچیتێ، نها بەرسینگێن لێ گرتین.

نەدڤێت دیدارێ ب دووماهیک بینیت، نەدشێت پەیڤەکێ بێژیت. پتر ژ عاشقەکێ چەندین سالا یارا خوە نەدیتی و ببینیت، ژ خۆ غەریب ببوو. دڤیا خۆ د هەمبێزا خۆ وەرکەت، و بێژیتە خۆ: «تە بو ئەز هێلامە بتنێ؟ ئەرێ تو نە د شیایی رۆژەکێ پڕسیارا من بکەی؟ ئەز نزانم ئەڤا هاتیە سەرێ من قەدەرا ژیانێ بوو، یان بێ ئارمانجیا تە بوو؟»

دڤیا بەرسینگێن خۆ بگریت و هندی هێز هەیە ل خۆ بکەتە قێژی و بێژیت: «کا خەونێن تە؟ کا ئارمانجێن تە؟ کا ئەو ژیانا تە خەون پێڤە ددیتن؟»

لێ ژ شەرمێن خوەدا، قوریچکەک ل بنێ گەروویا خۆ دا، و بەرێ خوە وەرگێرا بەر پێیێن خۆ. هندی هاتێ نەشیا جارەکا دی سەرێ خۆ راکەتەڤە، هێدیکا زڤری و جارەکا دی هەمی تشت ب بێدەنگی هێلانەڤە.