ژن و ژیان

ژیان ب هه‌بوونا ئافرەتێ به‌رده‌وام بویه‌ و تۆڤێ مه‌ مرۆڤان ژ ره‌گه‌زا مێ ده‌ست پێ كریه‌. هه‌بوونا وێ بنگه‌هه‌كێ گه‌له‌ك مه‌زنه‌؛ تو هه‌ر قه‌هره‌مان، زانا و ڕه‌وشه‌نبیره‌كی ببینی، سه‌ره‌كانی و بنه‌ڕه‌تا وی دایكه‌ك یان خویشکەکا ئافرەت و خودان شیانه‌. ئه‌ڤ هنده‌ مه‌زناتیێ دگه‌هینیت كو ژناڤچوونا وێ، ب دوماهی هاتنا ژیانێ و دونیایێ بخۆیه‌. خودێ ب خۆ چه‌ند بهایه‌كێ مه‌زن و پیرۆز دایه‌ ئافرەتێ، كو د په‌رتووك و شریعه‌تێن ئاسمانی دا گه‌له‌ك به‌حس لێ هاتیه‌ كرن، هه‌تا كو ئافرەت بوویه‌ ده‌رگه‌هه‌ك ژ ده‌رگه‌هێن چوونا به‌هه‌شتێ. ئه‌ڤه‌ ب شێوه‌كێ گشتی نیشان دده‌ت كو ئافرەت چه‌ند خودان پێگه‌هه‌.

ئه‌گه‌ر بهێین و به‌حسێ ئافرەت و شێره‌ژنا كورد بكه‌ین و وێ دگه‌ڵ ئافرەتێن ده‌وله‌تێن جیران به‌راورد بكه‌ین، دێ بینین شێره‌ژنا كورد ڕۆله‌كێ چه‌ند مه‌زن د هه‌می بواران دا گێڕایه‌؛ هه‌ر ژ ئالیێ سیاسی، جڤاكی و ڕه‌وشه‌نبیری ڤه‌ بگره‌ هه‌تا دگه‌هێتە دۆزا نه‌ته‌وه‌یی. خه‌بات و شۆڕه‌شا ئافرەتا كورد یا دیار و ڕوونه‌؛ وێ مل ب ملێ پێشمه‌رگه‌یێ قه‌هره‌مان، هه‌مان زه‌حمه‌ت و وێره‌كی هه‌بوویه‌. ل نیڤێن شه‌ڤێ ده‌ست و زه‌ندكێن خۆ هه‌ڵداینه‌، ته‌نوورا خۆ ب په‌لێن شارییێ داگیرساندیه‌ و ده‌ست ب چێكرنا نانی كریه‌ بۆ پێشمه‌رگه‌ی، دا كو بشێت ل به‌ر سینگێ دوژمنی خۆ ڕابگریت.

ژبلی خزمه‌تكرنا خێزانێ و مێری، ڕۆلێ وێ د سیاسه‌تێ دا ژی گه‌له‌ك یێ دیار بوویه‌؛ ب وێره‌كی هاتیه‌ زیندانكرن و ئه‌شكه‌نجه‌دان ژ لایێ دوژمنان ڤه‌، و هه‌تا ئاستێ شه‌هیدبوونێ چۆییه‌. بۆ نموونه‌، شه‌هیدا نه‌مر و ره‌وانشاد، سۆمبۆلا كوردایه‌تییێ و شێره‌ژنا كورد (له‌یلا قاسم)، كو خوراگری و به‌رخودانا وێ یا ب هێز هۆسا كر كو دوژمن ل به‌رانبه‌ر وێ دله‌رزی و هه‌می هه‌ولێن خۆ بده‌ت بۆ ژناڤبرنا وێ.

ژ لایێ ڕه‌وشه‌نبیری ڤه‌ ژی، د نوكه‌ دا و هه‌ر ژ كه‌ڤن دا، ئافرەتا كورد بوویه‌ مامۆستا، په‌رله‌مانتار و به‌رپرس د گه‌له‌ك بواران و ڕێكخراوان دا. حه‌تا ژ لایێ پزیشكی و ساخله‌مییێ ڤه‌ ژی، د دیرۆكا كوردان دا ب ناڤێ "داپیرك" یان "دادۆك" هه‌مان ئه‌رك و ڕۆلێ دكتۆران ب سه‌ركه‌فتیانه‌ گێڕایه‌.

من دڤێت ل ڤێرێ بێژم: هندی به‌حس ل ئافرەتێ بێته‌ كرن، ب تایبه‌تی ئافرەتا كورد، ب دوماهی ناهێت. چونكی ژیان و ئافرەت پێكڤه‌ گرێدایی نه‌؛ ژ ده‌سپێكا چێبوونا مه‌ مرۆڤان هه‌تا دوماهی هاتنا مه‌ ل سه‌ر ڤێ عه‌ردێ.

سلاڤ و ڕێز بۆ هه‌می ئافرەتان.