ترس ل کولانا مە گەنجەکێ بێ کارە ب زرتەکی پیاسەیان دکەت
ترس ددلێ پالەیەکی دا پاریەکێ نانی یە
ترس ددلێ زاروکەکی دا بێ بابی یە ، ئێتیمی یە

ترس ددلێ من دا دووبارەیا وێ رۆژێ یە ئەوا تۆچوی
ترس لدەف من ئێکەم سپێدەیه تۆ نەبوی

ترس هەلامەتێ ناڤزەڤییێ یە
ترس لدەڤ من روندک و گریێن وەغەرا مامۆستایێ یە
ترس لڤی واری چەکوچێ نەدادیێ یە ل جهێ ئاسنێن سورکری مرۆڤان د قوتیت
ترس ، پێلاڤەکا دڕیایە ، ترس ژڤانەکێ گیرۆ و عاشقەکێ ڤەمایە

ترس سپێدەیێن گورەپانا خواندنگەهێ و نینوکەکا درێژ و دبیردانکێ دا نەمایە
ترس ئاوازا کرێتا دەنگێ دارێ رێڤەبەری یە

ترس د من دا زلەهەکا ب نەحەقی یا هەڤژینەکێ بێ وژدانە
بۆ رویێن دلۆڤانێن خانما خۆ
بۆ مالا دانعەمرا چوونە
ترس ، تەڕگا بەهتینێ
دگەل بتنێمانێ کەهی بوونە
ترس هێشتا ل ئەلندێ
ئاڤابوونە
ترس بێ پارەیی و شویندەستێن برسێ نە لسەر روحا منێ سنێلە
ترس پێدڤیاتیا پەناگەهێ یە هەکو نەیی

ترس لدەڤ من تێکدانا یاریکێن زاروکانە
ترس لدەڤ من خۆشی دیتننە ژ پیسیا ژینگەهێ ، کەهی بوونە دگەل رکەهێ
ترس لدەڤ من دەربرینا ڤیانێ یە ب سترانەکا دێرینا هەمی جڤین
ترس لدەڤ من ، لبەرامبەر
برینێن رژد
حەنەکن و کەنین

ترس لدەڤ من ئەزم
هێشتا من نە خۆ ، نە ئەم نەنیاسین
ترس بۆ من دێوەکە
لەشێ چرکەیێن بێدەنگیا من
تێکدا هەمی برین
ترس بارانە
ترس سترانە
ترس یا دگەل لەزێ
و دکوکا خۆ دا ڤەمانە

"تۆخۆدێ کەی ما ئەم نەچین ؟!"