د حەوشا مالەکێ دا دارەکا مەزن هەبوو، خودانێ مالێ مریشکەك هەبوو چوار چیچکێن بچویک ژی ب دویڤەبوون، مریشکا وی هەرۆژ سپێدێ چیچکێن خۆ د برنە بن دارێ. خودانێ مالێ سپێدەهیەکێ رابو بەرێ خۆ دەتێ مریشکا د حەوشێ دا سێ تێشک یێ ب دویڤه. رۆژا پاشتر بەرێ خۆ دایێ مانه دوو و رۆژا دویڤدا ما ئێک. هزرێت خۆ کرن ئەڤه چییه ڤان چیچکا د خوت و د حەوشا من دا، چ گورگ و سه و گیانەوەر نەشێن بێنه د حەوشێ دا، رابو زێرەڤانی ل مریشکا خۆ کر. دەمێ سپێدێ ژ کولکی بەردایی، مریشک چو بنێ دارێ دگەل چیچکا خۆ. کابرای بەرێ خۆ دایێ، تەیرەک ژ سەر دارا د مالا وی دا هاته خوار خۆ ل چیچکێ دا بره سەر دارێ و خوار. ئەرێ هەرێ من دزێ خۆ گرت.

رۆژا پاشتر چاڤدێری ل تەیری کر هەتا ژ سەر دارێ بفریت. تەیر فری و کابرا چو سەر دارێ بەرێ خۆ دایێ تەیری هێلینا خۆ یا چێکری و چار هێک ژی یێت تێدا. گوت دێ باشه ئەز ژی دێ تولا خۆ لته ڤەکەم. هەر چار هێک بێ کو دەستێ خۆ بکەتێ کرنه دناڤ پاتەکی دا و ئینان خار. کرنە د قازانەکێ دا و کەلاندن. پشتی کەلاندین ئاڤا سار لێکر دا ب تەزن و پاشی راکرن، و برن کرنه دهێلینا تەیری دا.

تەیر هاته سەر هێکێن خۆ د هێلینی دا، هەیڤەکێ ما لسەر هێکێن خۆ، دوو هەیڤا ما لسەر هێکێن خۆ و بوونه سێ هەیڤ نه هەرێ هێک نەبوون چیچک و ژ هێکێ بێنەدەر، هەر چاڤەرێ ئەڤرۆ سوباهی بتێشکێت خو شاد ببیت نه هەرێ چ دیارنه بوو. هەتا چەند هەیڤ چوین تەیر ما چاڤەرێکری هێک نەبوون چیچک هەتا تەیر لسەر هێکا رەق بوی ژ قەهرێت خۆ دا.