سترانەک بۆ سوباهی

سترانەک بۆ سوباھی

ئەو ئێتیم و سێوییێ ھەنێ
ھەموو رۆژێن حەفتیێ؛
چاڤێن خوە ب خەما دشووت.

ھەموو ڕۆژان، ب دێمەکێ پوسیدە دگەل کاروانێ
بێدەنگییا خوە مێڤانە ل کەڤنە گۆڕستانەکا
مشتی ژ گۆڕێن بێی کێلی
بێی ناڤوونشان.!!!

ھەر جارەکا دچیتە گۆڕستانێ...
مستەکا ئاخێ. دئینت و ب سەرێ ھەموو
تنێ بوونێن خوە وەردکەت،
و گازی دکت ئەی ژیان...
ئەی دایکا مرۆڤایەتییێ!!
ئەی لاندکا ئێتم و سێویاتییێ!!!

کابێژە من: کی دێ کاروانێ خەونێن من دەتە ڕێ؟!
کی دێ سیبەرا خەمێت من
دەتە دەستێ ئاسوویان؟!
کی دێ ئاگرێ حەسرەتا سباھییان
ژدلێ من ڤەدەرکەت؟!

ئەی خودا... مرنێ
مینا کابووسەکێ سەرێ ھەموو ڕێکا
یێ لبەر من بەرزەکری!!!
لاشەیێ خوە ب تاریێ دنخافت و
ھەر گازی دکر ئەی خودا..!!

ڤی روویبارێ سار
ڤێ خەما دژوار
ڤی زارۆیێ بێی جهـ و وار
بکە پەیامبەرێ تنێ بوونێ.!!!

تێنکا وی، ب ڤان گازیێن ئاگرین نە شکەست
و ڤەگەرییا ڤە گۆڕستانێ
ھەر کێلیەکا ددیت ھەمبێز دکر
ھەر مریەکێ ددیت دگۆتێ "باب"
ھەر فریشتەیەکا ددیت دگۆتێ دادێ.!!!

ھەر گۆڕەکێ ددیت
دگۆتێ: ئادەم ژ ئاخێ یە و ئەم ژ ئادەمی نە
پا بۆچی بێھنا دایکا من ناھێت؟!
بۆچی ئەز بابێ خوە لپشت چ کێلییا نابینم؟!

وەرە دایێ... تو کراسێ غەریبییا خوە
بکە بەر بەژنا ھەموو خەمێن من:
وەرە باب تۆ.. ناڤێ خوە بدانە بەر ناڤێ من
دو پیتا ژناڤێ من ببە و بکە پەیڤ
دناڤ ڕستەیا، بێکەسییا مندا بکە جھناڤێ نەگۆر

ھەر شەڤ مینا ئەیوبی. بێکەسییا خوە دداعوویرم
مینا یۆسفی دبیرا
بێ وەفاییا مرۆڤاندا د خەندقم.!!!

لبەر لێڤا ھەموو سباھییان درۆینم
بەلکۆ ئێڤاریەکێ ھوون ڤەگەڕن.
دباخچەیێ لێڤێن، خوەدا ناڤێ وە دچینم
دخەونا خوەدا وێنێ وە دبینم

وەرن من بکەنە دناڤ ئەلبۆما..
سەفەرێن خوەیێن سەرابیدا
خەمێن من: ییێن پرت پرت بوویی
بکەنە ستڤانک دستۆیێ ڤەگەرەکێدا
غەریبییا خەونێن من یێن سەربری
ڤێکدەنەڤە...!

ئەز سترانەکا خەمگینم ژ عەشقێ
وەرن... شەمالکێن ژدایکبوونا من
دناڤ دەستێن خوەدا ھەلبکەنەڤە
و بکەنە چرا و فەنەر
من دناڤ ڕۆحا خوەدا ھەمبێز بکەن

خەریبەکم...
غەریبەکم...
دناڤ مەملەکەتا وەرزەکێ سپیدا
یێ ژ دایکبوویم
ڕێڤنیگەکم مشتی پشتا من خەم و ژانن
مشتی برین و کۆڤانن
نزانم کیڤە بچم!!!
ل دەرگەھێ کیژان ڕێکێ بدەم؟!

وەرن ڤێ ڕییا درێژ، بومن نەخش بکن
شووین پێن خوە لێ بچینەڤە
وەرن دا ب ھەڤرا غەریبییا بسۆژین...

من: نەڤێن چ تاسا ژ غەریبیێ ڤەخۆم
ئەی ئەوا غەریب تر ژ دەمی...
ئەی ئەوێ شرین تر ژ ئادەمی...
ھووین کیڤە بەرزەیوونە؟!

وەرن دا ھەموو ژورێن دلێ خوە
بۆ ھاتنەڤەیا وە، ب گۆلا ب خەملینم و
ھەموو رۆژێن ژیێ خوە
بکەمە چرا
ھەموو گرنژینێن خوە
لبەر ھاتنەڤەیا وە ب رائێخم...!

ئێدی گۆهـ ل سترانێن خەمگین ناگرم
ئێدی خوە دناڤ قێژیێن
پارۆڤەییاندا ڤەناشێرم
دێ چمە دناڤ دلێ ھەموو باخچەیێن گەرمدا
ھەتا مشتی دبم ژ بێھنا ڕیحانا
دێ میلێن ھەموو دەمژمێرێن
بەندەمانێ ڕاوەسیتنم
جاردن ڤەناگەرم ناڤ دلێ تنێ بوونێدا
ھەتا ب ھەڤرا و ب نەمری
دەربازی بەرزەخێ ببین...