ڕۆلێ ڕەوشنبیری د ناڤ هەر جڤاکەکی دا بتنێ کۆمکرنا زانیاریان یان خواندنا پەرتووکان نینە، بەلکۆ ئاڕاستەکرنا جڤاکی و ئاڤاکرنا هزرا ئازادە. ئێک ژ گرنگترین پایەیێن تێگەهێ ڕەوشنبیریا ڕاستەقینە باوەرکرنە ب ڕۆلێ ڕەخنێ. ڕەوشنبیرێ دروست ئەو کەسەیە کو ئامادەیی هەبیت ڕەخنێ ل کێماسی و ئاریشەیێن جڤاکی بگریت، و د هەمان دەم دا ب سینگەکێ بەرفرەهـ ببیته بۆ وەرگرتن و قەبوولکرنا ڕەخنێ ل سەر کار و هزرێن خۆ.

ڕەخنا ئاڤاکەر هێزا سەرەکی یا پێشڤەچوونێ یە. دەما ڕەوشنبیر ب چاڤەکێ ڤەکری بەرێ خۆ ددەتە دیاردەیێن جڤاکی، سیاسی و کلتووری، ئەو دشێت کێماسیان دەستنیشان بکەت و ڕێکێن چارەسەریێ پێشنیار بکەت. بێ ڕەخنە جڤاک دکەڤیتە د ناڤ ئالۆزی و زۆرداریێ دا، چونکی بێدەنگی بەرامبەر شاشیان دبیتە بەردەوامییدان ب وان شاشیان. ژبەر هندێ، ئەرکێ زانستی و رەوشتی یێ ڕەوشنبیری ئەوە کو بێ ترس بئاخڤیت و دەستێ خۆ ب دانێتە سەر برینان، نە کو بتنێ دەستوورێ ب بابەتێن ئاسایی بدەت یان مدح و مەدحێن بێ مفا بکەت.

قەبوولکرنا ڕەخنێ و جوداهیا وێ ژ هێرشا کەسۆکی

سەرەڕای ڤێ چەندێ، یا گرنگتر ئەوە کو ڕەوشنبیر ب خۆ ژی بشێت ڕەخنێ قەبویل بکەت. نابیت کەسێن ڕەوشنبیر هزر بکن کو تنێ وان مافێ ئاخفتنێ هەیە و کەسێن دی ماف نینە ئاخفتنا وان بێخیتە بەر پسیارێ. دەما ڕەوشنبیر ژ ڕەخنەگرتنێ توڕە بوو یان بەرسڤا ڕەخنەگران ب شێوەکێ توند دا، ل وی دەمی ئەو رامانا ڕەوشنبیریا خۆ ژ دەست ددەت. قەبویلکرنا ڕەخنێ نیشانا مەزناهیا هزری و وەفاداریێ یە بۆ ڕاستیێ، نە بۆ حەز و ئارەزوویێن کەسۆکی.

ڕەخنا ئاڤاکەر و هێرشا کەسۆکی دو تشتێن ژێکجودانە. پێدڤییە ڕەوشنبیر جوداهیێ بێخیتە ناڤبەرا ڕەخنا زانستی، کو مەڕەم پێ پێشڤەچوون و ئاڤاکرنە دناڤبەرا ئاخفتنێن بریندارکەر دا. قەبویلکرنا ڕەخنا زانستی دبتە ئەگەر کو ڕەوشنبیر هزرێن خۆ باشتر بکەت، شاشیێن خۆ ڕاستڤەبکەت، و ل سەروان بابەتان بگەڕیێت کو پێشتر زانیاری ل سەر نەبووینە. چ مرۆڤ خودان هەمی شیان و ڕاستیێن تەمام نینن، و هزرێن ڕها (مۆتلەق) بتنێ د مێشکێ کەسێن ڕاسپێردراو و گرتیدا هەنە.