هێزا بەردەوامبوونێ

هێزا بەردەوامبوونێ

من دڤێت تیشکێ بێخمە سەر تشتەکی کو ئەگەر ئەو تشتە نەبیت، چ کەس نەشێت بگەهیتە چ جۆرێن سەرکەفتنێ، ئەو ژی هێزا بەردەوامبوونێ یە.

بۆ وێ چەندێ ب باشترین و سادەترین شێوە د ڕامانا وێ بگەهین: بەردەوامبوون ئانکو خۆ نە دەستڤەبەردان بۆ وی کاری، یان وێ خەونێ، یان وێ ئارمانجا تە بخۆ د ژیانا خۆ دا دەستنیشانکری.

ڕێکا سەرکەفتنێ یا ڕاست نینە، و بێ ئاستەنگ و کێشە ژی نینە. بەلکو ڕێک یا پڕە ژ ئاستەنگی و شکەستنان، لەورا کەسێ گەشبین و خودان هیڤی دزانیت ل پشت هەر کەفتنەکێ و ئاستەنگییەکێ، دەلیڤەکا نوی یا هەی بۆ ڕابوونێ، ژبەر هندێ بەردەوامبوون هەلبژاردەیا وی یە.

هەر وەکی دەمێ تۆ بزمارەکێ د دیوارەکی داقوتی، ب ئێک لێدانا چەکوچی بزمار جهێ خۆ د دیواری دا ناکەت. لێ یا پێدڤی یە تۆ چەند جاران ل سەر ئێک و ب بەردەوامی لێبدەی تاکو جهێ خۆ چێدکەت. ل ڤێرە هێز نە ژ مەزنیا چەکوچی بوو، بەلکو ژ بەردەوامبوونا لێدانێن تە بوو.

بەلێ، گەلەک جاران کار مەزن و گران دبیت و مرۆڤ زوی ماندی دبیت. سڕووشتێ مرۆڤی وەسایە کو جارنا دێ بێژیت: بەسە، ئەز ماندی بووم! ئاها ل ڤێرێ دڤێت تۆ دەستبەردار نەبی، دڤێت تۆ بتنێ بێهنا خۆ بدەی دا کو هێزا خۆ کۆمڤە بکەی بۆ بەردەوامبوونێ. د ڤان خۆلەکان دا، بیرا خۆ ل ئارمانجا خۆ بینە، و هزر د وێ چەندێ دا بکە دەمێ تۆ خەونا خۆ دەستخۆڤە دئینی، دێ د چ خۆشیەکێ دا بی! چ جاران نەڕاوەستە، چونکی دەرئەنجامێ بەردەوامبوونێ هەر سەرکەفتنە.

ژ لایەکێ دیڤە، بەردەوامبوون بتنێ مە ناگەهینتە ئارمانجان، بەلکو د وێ ڕێکێ دا دێ فێری گەلەک تشتان بین، ژ وان ژی دێ بیتە ئەگەر کو مرۆڤ ببیتە کەسەکێ خودان ئەزموون، پتر باوەر ب خۆ هەبیت، خودان سەبر بیت، و فێری ڕێکێن سەرەدەریکرنێ دگەل کێشەیان و چارەسەرکرنا وان بیت.

و ل دیماهیکێ دێ بێژم، بلا هەر دەم ل بیرا تە بیت، ئەگەر ڕێک چەند یا ئاڵۆز و درێژ بیت، دەستان ژ خەونێن خۆ نەبەردە. بزانە ل دیماهیکا وێ، سەرکەفتن بۆ وان کەسانە یێن بەردەوامی دایە ڕێکا خۆ، و ئەڤە یا مسوگەرە.