چەوانییا پاراستنا شینکاتیێن بەرسیبەرێ د وەرزێ زستانێدا

شینکاتیێن بەر سیبەرێ دهێنە نیاسین ب پاقژکرنا هەر هەوایەکێ پیس یێ ناف مالێ و وەرگرتنا دووەم ئۆکسیدی کاربۆنێ و دەرهاڤێژتنا ئۆکسجینێ د ناف وێ ژینگەها کو شینکاتی لێ دهێتە بخودانکرن. ل ڤێرێ دێ دەینە دیارکرن کا چەوا شینکاتیێن بەر سیبەرێ دێ هێنە پاراستن، ئانکو د ساخلەم بن د وەرزێ زستانێدا، چونکی د وەرزێ زستانێدا پلەیێن گەرماتیێ دهێنە خوار و ڕۆناهییا هەتاڤێ کێم دبیت و ڕێژەیا شهێ ژی دهێتە گوهۆڕین. ب شێوەیەکێ گشتی، پتریا شینکاتیێن بەر سیبەرێ د وەرزێ زستانێدا ژ گەشێ ڕادوەستن.

دا کو شینکاتیێن بەر سیبەرێ د ساخلەم بن د وەرزێ زستانێدا و دگەل ژینگەها مالێ دا بژین، دڤێت ئەڤ خالێن ل خوارێ دیارکری ب بەرچاڤ بهێنە وەرگرتن:

١- ڕۆناهی: ل دەمێ زستانێ ڕۆناهییا هەتاڤێ، ئانکو تیرۆژکا ڕۆژێ یا ئێکسەر بۆ شینکاتی گەلەک یا ب مفایە و هەتا بۆ چەند دەمژمێران ژی یا باشە، و چەند ئەڤ شینکاتییە ل نێزیکی وان پەنجەران بن ئەڤێن هەتاڤ لێ بدەت گەلەک باشە، چونکی ب شێوەیەکێ گشتی شینکاتی د وەرزێ زستانێدا پێدڤی ب ڕۆناهیەکا باشن.

٢- پلەیا گەرماتیێ: پلەیا گەرماتیێ ئێکە ژ هۆکارێن هەرە گرنگ کو کارتێکرنا خۆ ل سەر گەشەکرنا شینکاتییان هەیە، هەروەسا پێدڤیێن پلەیێن گەرماتیێ ژ شینکاتیەکێ بۆ شینکاتییەکا دی یا جیاوازە، چونکی هندەک شینکاتی پێدڤی ب پلەیێن گەرماتییا بلندن و هندەک ژی پلەیێن ناڤنجینە و هندەک ژی پلەیێن نزمن.

٣- ئاڤدان: ڕێکخستنا ئاڤدانێ، ئێکە ژ خالێن هەرە گرنگ بۆ شینکاتیێن بەر سیبەرێ د وەرزێ زستانێدا، و پێدڤییە هشیاربوونەکا هەرە باش هەبیت د دەمێن د نافبەرا ئاڤدانا ئەڤان شینکاتییان دا. ب شێوەیەکێ گشتی، دڤێت د ناڤبەرا ئاڤدان بۆ ئاڤدانێ دا ئاخ ب تەمامی یا هشک بیت و پاشان شینکاتی بهێنە ئاڤدان، چونکی گەلەک ئاڤدانا شینکاتیێن بەر سیبەرێ، و ئەگەر شینکاتی پێدڤی نەبیت دێ بیتە ئەگەرێ ڕزینا ڕهێت شینکاتییان و ژ کار کەڤن، لێ هندەک ژ وان هەنە ئەگەر د وەرزێ زستانێدا ژی بن، دڤێت هەر ڕێژەیەکا شهێ د ناڤ ئاخا وان دا هەبیت ل دەمێن د نافبەرا ئاڤدانێ دا وەکی شینکاتیێ (فۆجێر).

٤- شهـ: ئەو شینکاتیێن د وەرزێ هاڤینێدا حەز ژ ڕێژەیا شها بلند دکەن، دڤێت د وەرزێ زستانێدا ڕەشاندنا وان گەلەک یا کێم بیت وەکی شینکاتیێن (لێبلاب و مەتاتی فیکس).

٥- باگۆهۆڕین: د وەرزێ زستانێدا ب تایبەتی ل دەمێ شەڤێ پتریا پەنجەرێن ناف مالێ دهێنە گرتن و باگۆهۆڕین گەلەک کێم دبیت، یا باش ئەوە دەمێ دبیتە ڕۆژ پێدڤییە ب شێوەیەکێ باش باگۆهۆڕین چێببیت، ئەو ژی ب ڤەکرنا پەنجەران یان هەر ئامیرەکێ کو باگۆهۆڕین پێ چێببیت، هەروەسا دوورئێخستنا شینکاتیێن بەر سیبەرێ ژ هەر ئامیرەکێ هەوایێ گەرم ئێکسەر ژێ دەردکەڤیت.