چ دەما  کوردستان داگیر نابت

تشتەکێ نورماله د جیهانا ئەڤرۆ دا ل کیش وەلاتێ جیهانێ تو بکاری بەرهەم هێنانێ بکەی یان بەرامبەر کرینا شوقەکێ یان جهەکێ بازرگانی، نه دێ بێ خودان عەرد و شوقه بەلکو هەتا ناسناما وی وەلاتی ژی دێ دەنه ته. ژیان ئەڤرۆ یا هاتیه گوهوڕین؛ کا چەند عەرەب هاتینه کوردستانێ، بیست جارا هند کورد ل سەرانسەری وەلاتێن جیهانێ بەلاڤ بوینه و ناسانامه ژی لسەر وی وەلاتی وەرگرتینه و بوینه ئێك ژ وی وەلاتی و هەمی مافێن وەلاتپارێزی د وەرگریت.

بەس من گولێ نەبویه چ کەسێن بیانی، عەرەب و تورك، حکومەتا هەرێمێ بو خاترا کرینا شقەکێ یان مەزرەعەکێ یان کۆمپانیەکێ ناسناما ئاکنجیبونێ وەرگرتبیت.

سەرمایەگوزاریا کوردان ل تورکیا و مەترسیێن وێ

دێ جارا بەرێ خۆ دەینە خۆ، ئانکو کوردێن مە ل باشورێ کوردستانێ؛ کا چەند ڤیلا و قەسر و شوقه ل باژێرێن تورکیا و تایبەتی باژێرێن تورک‌نشین وەک مێرسین، ئەنتالیا، ئیستەنبول و گەلەک جهێن دی هەنە. لدیف ئامارێن ئێکەتیا وەبەرهێنانا کوردستانێ تا نوکە لدیف ژمارێن وان یان ئەوێن ئەو پێ ئاگادار، پتری 26 هزار کوردێن باشور یێن خەلکێ (زاخۆ، دهۆک، هەولێر، سلێمانیێ و گەلەک جهێن دی) هەر ئێک ژ وان لدیف پارێ هەیی ڤیلا، شوقه، کۆمپانی و سەیارە ل تورکیا کرینە و بوینە خودان ناسنامێن تورکی.

سەرو سامانێ کوردستانێ برینە دناڤ وەلاتەکێ دی دا و پێ کار دکەن. ئەها ئەڤە مەترسیە کو خەلکێ زەنگین سەرو سامانێ وەلاتی ببیتە ژ دەرڤەیی وەلاتی و کار پێ بکەن، ئەڤە زەرەر و زیانێن مەزن دگەهینیتە ئابووریا کوردستانێ.

کارتێکرنا سیاسی و وەفادارییا نیشتمانی

یا هێشتا مەترسیدارتر ئەڤێن ناسنامێن تورکی ل کوردستانێ هەین، دەمێ هەڵبژارتنێن بوری یێن تورکیا، هەمی ژلایێ تورکیا ڤە هاتن ئاگادارکرن دا کو بەشداری هەڵبژارتنێن تورکیا ببن و بەشدار بون ژی. یا هێشتا مەترسیدارتر ئەوە کو هاولاتیێ باشور (وەلائا) وی ڕۆژ بۆ ڕۆژێ بۆ تورکیا زێدەتر لێدهێت لسەر خاترا ناسناما خۆ یا تورکی و ئەو شوقه یان ئەو پرۆژەیێ وی ل تورکیا کری.

هەردەم چاڤێ وی ل کاودانێت سیاسی یە؛ دەما کوردستان نەخۆش ببیت دێ بەرەف تورکیا چن، چونکی کاروبارێن وان دروستن و هاولاتیێت تورکینە. دبیت کارتێکرنا تورکیا ژی لسەر وان هەبیت دەمێ هەڵبژارتنێن کوردستانێ و عێراق دهێنەکرن، چونکی خودان دوو ناسنامەنە و مافێ هەیی ل کوردستانێ ژی دەنگێ خۆ بدەن.