چیرۆک

ئەلبۆم

نووسینی: عادل عەبدولمەجید یووسف

پەنجەرەیا هۆلێ تیرۆژکەکا ڕۆژێ یا د ناڤ پەراسیێن خوە ڕا ئینایە ژوور، هەروەکی داتاشۆیەکێ ئەو گەرک و تۆزە یا د ناڤدا نماییش دبیت. ڕەقە ڕەقا ساحیبا لێنانگەهێ د وێ بێدەنگیێدا، ڕیتمەکێ چاڤەرێبوونێ یێ خولماندی. ئەو شەلتا کو پێیێن وی هەموو نەنهالتی یا لبەر بایێ پانکا ب هنداڤ سەریڤە، مینا پێلەکا ئاڤا ڕەحەت یا ڕادبیت و درینیت. دەستیێن خوە دانە بەر خوە و پیچەک خوە کێشا سەری، بێی وی دەنگێ ئازارەکێ ژێ دەرکەڤت، هەروەکی تو ب زۆری تشتەکێ گران بدانی. پاشی بێهنا خوە کوور هەلکێشا.. دەستێ خوە دا وی دۆلکێ ئاڤێ و دا سەر دەڤێ خوە، هینگێ دانا تاکو دلۆپ تێناهایی. حرێین ژ گەوریا خوە ئینا و دوو سێ هەناسێین دی هەلکێشان. دەستدا پاکیتێ، جگارەک ژێ ئینادەر و کرە د ناڤ لێڤێن خوە دە، دگەل چرکینا چەلمالێ چکینا دەرگەهێ حەوشێ هات، ئاگرێ چەلمالێ یێ هەلە و جگارە د ناڤ لێڤان ڕا ل هنداڤە و چاڤێن وی ڕک دبن بریان ڕا یێ لێ کا کیە دێ ب ژوور کەڤیت؟

دەنگێ دەرگەهێ لێنانگەهێ هات، پشتی چەند چرکەیان، چرکێن ژ پالکەکی هات. ڕەقە ڕەقا ساحیبێ ژی ڕاوەستیا، دەنگێ پێیان نێزیک بوو، هێشتا چەلمالا وی یا هەلە و جگارە ل هنداڤە و چاڤێن وی ڕکن. هێڤی ب ژوور کەت پشتی زانی ئەوە جگارا خوە کرە دناڤ گۆریێن ئاگریدا و بەردایێ..

— ئەها.. دایکا من ژبەر بێهنا جگارەیان ساحیبە هێلابوو هەل! کادا هەلکەهەڤە

چەلمالا خوە دانا سەر پاکیتێ و ب دەستێ دی ئیشارەت دایێ، کو بهێتە دەڤ ڕووینیتە خوار. هێڤی هاتە دەڤ ڕووینیست. بەرێ خوە دا چاڤێن وێ، هێڤییێ پیچەک شەرمکر، خوەلیا جگارا خوە دالۆتا خۆلیدانکێ و دەنگەکێ گەلەک نەرم گۆتێ:

— ها من جارەکێ دیدارەک د ناڤبەرا خۆ و تەدا دانایە، کو تو تشتەکی ل من ڤەشێری؟

جلفەک ب هێڤییێ کەت

— نە! بەش ڕزگاری بۆ تە گۆتییە؟

پێلەک ل جگارەیێدا و سەرێ وێ هەرضاندە د خۆلیدانکێدا

— نە باوەرکە بابۆ ڕزگاری نەگۆتیە، لێ ئەز چاڤێن تە دخوینم و هەست پێ دکەم بابۆ خۆالم.

هێڤیێ چاڤێن خوە گرتن و پاشی ڤەکرن و گرنژی

— باب، ئەڤە دێ بیتە بیست و تشتەک ڕۆژ ئەز دچمە کۆمپانییەکێ کار دکەم، من دزانی تو دلنادەی من فرێکەی، لەوڕا من نە گۆتە تە، تو ب خودێ ڕێگرییێ ل من نەکە.

گرنژی و دەستێ خوە ب پرچا وێدا ئیناخوار

— نە کچا من ڕێگریێ ناکەم، مادەم تە پێ خۆشە هەرە، من ئەو تشت نەڤێت یێ بۆ هەوە نەخۆش

هێڤی ڕابوو سەر خوە

— باب دا بچن خوە بگەهۆڕم، بەش کا دایکا من؟

دەستێ خوەدا بەر دەڤێ خوە و دوو سێ جاران کۆخی

— ئەز دبێژم بەحسا مالا بەسنایێ دکر

بۆ بابێ خوە گرنژی خوە چەهاند و ماچەک ل ڕوییێ وی دا

— دێ خۆ گوهۆڕم و پاشن سەحکەمێ

ئەو ژی بۆ هێڤییێ گرنژی و سەرێ خوە لێ هەژاند. هێڤی چوو د ژوورا خوەڤە، جانتێ خوە دانا و دەرگەهێ لەمسۆرا خوە یا جلکان ڤەکر. جلکێن خوە ژبەر خوە کرن. دەستەکێ تەرەکسۆتێن ناڤمالێ کرێ. پرچا خوە ژی بادا و بادا کرە بالۆلکەک و وەکی چینی و ژاپۆنیان دارکەک کرە دناڤدا و هێلا وەسا. دەرگەهێن لەمسۆرێ گرتن، دەنگێ تەلەفۆنا وێ هات

— ئەلۆ برا، یا، تو ل کیڤەی؟ باشە هەمە وەرە ئەز ژی یا ل مال، باشە برا باش

بلەز دەرکەڤت..

— باب دێ سەحکەمە دایکا خوە و دێ هێم

پاکیتا خوە ڤەکر بێی بەرێ خوە بدەتە هێڤییێ

— بابۆ دگەل دەستێ خوە پاکیتەکێ ژی بۆ من بینە.

هێڤی زڤری ژوورا خوەڤە. جانتێ خوە ڤەکر، بەرێ خوە دایێ و سەرێ خوە بلندکر و هەناسەک هەلکێشا. دەستدا تەلەفۆنا خوە و ڤەکر. پاش، برە سەر ناڤێ ڕزگاری و بۆ کر

— ڕزگار پاکیتەکا جگارا بۆ بابۆی دگەل خۆ بینە، ئەرێ ئە، سەرچاڤان

جارەکا دی بلەز دەرکەڤت؟ ڤێجارێ، بێی ڕاوەستان کرە غار و چوو، دەرگەهێ حەوشێ ڤەکر و بەرێ خوە دایێ، عەلاگەکێ نانی یێ د دەستێ دایکا وێدا و یا ژووردا دهێت.. چوو بەراهییا وێ عەلاگێ نانی ژ دایکا خوە وەرگرت

— پانێ دا ل دویڤ تە ڕا هێم و سەحکەمە تە. ڕزگاری تەلەفۆن کر و ئەو ژی یێ دهێت

دایکا وێ دەستێ خوە دا پشتا وێ

— من سەحکرە بەسنایێ کا چ کر، بەش نەهەرێ..

هێڤییێ ب ڕەخیڤە سەحکرە دایکا خوە

— دادێ، من دەستپێکێ گۆتە تە ئەو ئێکجاری دبێ بێحالە.

دایکا وێ دەستێ خوە دا دەرگەهێ حەوشێ و ڤەکر ب بهێی هەلوایی

— ئەرێ.. ب خودێ دایێ ضیڤوری پێ دچن. بەش من گۆت، بەلکی بێژیتە برایێ خوە ئەوێ ژدەرڤە

هێڤییێ دەستێ دایکا خوە گرت و ڕاوەستاند

— دادێ دێ تشتەکێ بێژمە تە بەش بال بابۆ نەزانیت

دایکا وێ هشک ڕاوەستیا

— خێرە!؟

دەنگێ تەلەفۆنا وێ هات.

— ئەلۆ، ئە .. ئە دادێ یێ ئینایـ هەمە پاکیتەکێ بۆ بابۆی بینە و وەرە، بال.. ball سەرچاڤان

Tەلەفۆن دانا، بدەنگەکێ نزم گۆتە دایکا خوە

— من ڕزگار ژی یێ تێگەهاندی، خودانێ شریکێ دێ هندەک پارەی دەتە من و هەیڤانە دێ ژبەر مووچەیێ من بڕیت.

دێوێ دایکا وێ گەش بوو، هەروەکی ئێکی خەلاتکری

— هێشتا من نەگۆتیێ، بەش سۆلینا هەڤالا من ئەڤە بۆ من گۆت، چونکی دا بوونە وێ ژی.

هند کەیفا دایکا وێ هات نەدزانی دێ چ کەت

— ئێ پا دێ تو ل چ مایە ئاسێ لەزێ بکە..

دەستێ دایکا خوە گرت و برە ژوور. نان دانا سەر کەوانترێ و ئەو دایکا خوە چوونە هۆلێ (باب، ئەڤە ڕزگار یێ دهێت دێ پاکیتا تە ژی ئینیت.) دڤیا پێیێن خوە ژبەر خوە ببەت نەشیا (ستی، کا وەرە پیچەکێ پێی من بخشینە، بنێ پشتا من ئێشا.) هێڤی و دایکا خوە هەردوو چوونە پێی وی و هێدی کێشان تاکو پشتا وی ڕاستبووی. هەناسەک هەلکێشا

— ئێهـ، بەسە بەسە.

ستییێ شەڵتە ب سەر پێی وی دادا

— کا دا ئەز سەحکەمە شیڤەکێ

د وان دەلیڤەیاندا ڕزگار ژی ب ژوور کەت

— چ حالێ هەوەیە؟ هوین باشن؟ باب تو یێ باشی. ئەڤە پاکێتا تە.

بابێ وی دیسا دەستیێن خوە دانە بەر خوە و خوە کێشا سەری

— بخێرهاتی بابۆ، بەش خێرە تو ئەڤرۆ زوی یێ هاتی؟

ڕزگاری بەرێ خوە دا هێڤییێ

— ئەڤرۆ گەڕا منە باب، هەر ڕۆژ گەڕا ئێکێیە زوی بچیتەوە.

هێڤی چوو لێنانگەهێ، ڕزگار ل دویڤ وێدا چوو. دایکا وان یا مژیل بوو. ڕزگاری ب لڤینەکێ ئیشارەت دا هێڤییێ و هەردوو چوونە حەوشێ ..

— هێڤی ئەم چ بکەین؟ من گۆتە خودانی، گۆت ئەز نەشێم گەلەکا بدەمە تە. ئانکو نابیتە ئەو پارە یێ تێرا نەشتەگەرییێ بکەت.

هێڤییێ بەرێ خوە دا دەوروبەرا پاشی دەستێ وی گرت و وێڤەبر..

— کا دێ ئەو چەندێ دەت، یێن مایی ئەز ژی دێ ژ کۆمپانییێ لەر کەم

چاڤێن ڕزگاری زیک بوون !

— مادێ دەتە تە?

هێڤییێ هێدی گۆتێ

— نادەنە هەمی کەسان، بەش هەڤالەکا من ژی ژێ وەگرتبوون، یا گۆتی ئەز دێ ڕێکێ بێژمە تە دێ دەتە تە.

ڕزگار ها فکرێن خوە کرن..

— ئانکو؟
— نزانم ئەو دزانیت .

ڕزگار حێبەتی بوو. هێڤییێ دیسا بەردەواهیدا ئاخڤتنا خوە یا هێدی

— ئەو دێ دەتە من و هەیڤانە دێ ژبەر من بڕیت.
— ئێ دێ وەبێژە، پا سوبەهی دێ تەلەفۆنا تە کەم و بێژمە تە من هندە ئینان یێن مایی ژی تو ژ کۆمپانییێ بینە.

بەری بچنە ژوور ب وێ کەیفێ هێڤییێ دەستێ ڕزگاری گرت و هێدی گۆتێ

— بابۆ نەزانیت ها!

ڕزگاری ژ کەیفا سەرێ وێ خۆراند و دەستێ وێ گرت و چوونە لێنانگەهێ. دایکا وان بەرێ خوە دایێ، پاشی بەرێ خوە دا ڕزگاری ناڤچاڤێن خوە لێکرنە گرێ و هەردوو چاڤێن خوە بۆ ڕەخی برن. هەروەکی ئەو بابەتی دزانیت لێ دبێژیتێ هشیاری بابێ خوە بە، نەزانیت. هێڤی چوو ژوورا خوە و بلەز تەلەفۆن بۆ سۆلینێ کر

— ئەلۆ، سەرچاڤان، چ دکەی، یا، ئێ ئێ، دا بێژمە تە بۆ وێ سوحبەتێ ئەز چاوا بێژمێ و چ بکەم؟ ئێ، ئەرێ، چ؟ نوکە؟ یا، چ بێژمە مال؟ ها ئێ ئێ، باشە دێ کارێ خوە کەم هەتا دهێی، بال بال

تەلەفۆن دانا و هەرها و فکرێن خوە کرن. پاشی بلەز بەرەڤ لێنانگەهێ چوو. ڕزگار یێ دگەل دایکا خوە دئاخڤیت

— دادێ جارادی نۆژداری ب ئاشکرای گۆت، تاکی دوو هەیڤێن دی نەشتەگەرییێ بۆ نەکەن، ئەو لڤینا مایی ژی نامینیت. ب کورتی دێ ب تەمامی شەلەلی بیت !

هێڤییێ خوە نێزیککر و هێدی گۆتێ

— ئەڤە سۆلینا هەڤالا من یا دهێتە دویڤ من ڕا ل سەر وێ سوحبەتێیە..

ڕزگاری بەرێ خوە دا دایکا خوە پاشی زڤڕی بەرێ خوە دا hێڤییێ

— ڤێجا بۆچی نوکە؟

هێڤییێ دەرگەهێ لێنانگەهێ گرت و هێدی گۆتێ

— سۆلینێ یا گۆتییە خودانی، خودانی ژی یا گۆتییێ کا بال بهێتە دێ چینە خوارنەکێ پێکڤە و دا چیرۆکێ ب دروستی بزانم، وەکی وێ دگۆت گەلەک یا مایی پێڤە تاکو ڕازی کری، دوماهیکێ یا گۆتی کا بال بهێت دا بزانم پێدڤی ب چەندێیە و بال کەسێ کۆمپانییێ نەزانیت، دا ئەڤ دەرگەهە ڤەنەبیت.

دایکا وێ بەرێ خوە دا ڕزگاری

— بلەز کارێ خوە بکە و هەرە

هێڤی زڤڕی داکو بچیت کارێ خوە بکەت. ڕزگاری دەستێ وێ گرت .

— برا دێ چەندا ئینی?

هێڤی ها هەر بەرێ خوە دایێ

— ئەها... کا تو ڕاپۆرتا نۆژداری و تیشکا و پشکنینان ب دەڤ من ئەو دگرنگن.

ڕزگاری هێڤی برە وێڤە و دەڤێ خوە برە بن گوهێ وێ و پستپستەک کر. دایکا وان تێنەگەهشت تنێ ئەو بهیست دەما هێڤییێ گۆتییێ

— ئەو بەسی هانە؟

ڕزگاری ژی سەرێ خوە هەژاند هەروەکی گۆتییێ ئەرێ.. هێڤی چوو ژوورا خوە و خوە گوهۆڕی و بلەز هاتە د لێنانگەهێڤە..

— هەکە بابۆی گۆت، بێژنێ کارەکێ بلەز یێ کۆمپانییێ چێبوو، هەمی کارمەند یێن داخوازکرین، بێژنێ دێ دوو دەمژمێرەکا گیرۆ بیت.

دایکا وێ لێ زڤڕی

— و شیڤ

هێڤییێ کرە کەنی

— ئەز و سۆلین داخوازکرییێن ویینە بۆ شیڤێ، ها ئەز چ دبێژم .

ڕزگاری ملێ وێ گرت و بر..

— کا تو هەرە بابۆ یێ ب ساناهییە.

هەردوو چوونە حەوشێ و تەلەفۆنا هێڤیێ لێدا، ڕزگاری هەردوو بریێن خوە بلندکرن، هەروەکی گۆتییێ بەرسڤێ بدە. هێڤییێ تبل خوە لێدا و ڕاکر

— ئەلۆ، ئەرێ، باشە، ئەها ئەڤە ئەز هاتم.

تەلەفۆن ل بن گوهی بوو، دەستێ خوە ل ملێ ڕزگاری دا و چوو.

ڕزگار هاتە ژوور ب لەز نالیۆنێ زادی بر و چوو هۆلێ، دایکا وێ ژی هێدی هێدی پێخوارن برن. پشتی خوارن دانای و ستییێ هەرسێ کۆپێن چایێ تێکرین. سوایل ها هەر بەرێ خوە دایێ

— کا هێڤی؟

ڕزگاری زوی بەرسڤدا

— باب کارمەندێن کۆمپانییێ هەمی داخوازکرنە وێرێ بو کارەکێ بلەز، ئەوێ ژی بلەز کارێ خوە کر و چوو نەگەهشت بێژیتە تە، هەمە گۆتە من و دادێ بێژنە بابۆی چوو بەش دوو دەمژمێرەکین و دێ زڤڕم.

بالیفکێن وی دانە پشت و هێدی هێدی خوە کێشا سالل و چایا وی تێکڤەدا و داڤێ، ستییێ خوە نێزیکر و نان کرە پاری پاری و ل دویڤ حەزا وی کا دلێ وی دچیتە چ ؟ پاریێ نانی دوێ خوارنێ دهەهاند یا و دایێ.

ڕزگار ژ سەر خوارنێ ڕابوو ..

— هوین بخۆن من گاڤا دی لەفەک ژی یا خوارن، دێ چم تەلەفۆنەکێ کەم.

بابێ وی کرە کەنی

— تو یێ تەنای، تەلەفۆنێ تو تێرکری ڕوویڤی.

ڕزگار گرنژی و چوو.

شەڤ یا بەرەڤ نیڤێ دچیت، هێڤی ب ژوور کەفت، ڕزگار یێ ل حەوشێ بوو بەرێ خوە دا ڕزگاری و هاتە دەڤ، دەستێ خوە دا جانتا خوە و زەرفەک داڤێ. ڕزگاری باوەر نەدکر!

— ئانکو دانە تە؟

هەردوو چاڤێن خوە یێن ماندی لێ گرتن هەروەکی دبێژیتێ ئەرێ. ڕزگار ها بەرێ خوە دایێ

— هێڤی؟ تو یا باشی؟

هێڤییێ هەر بەرێ خوە دایێ و ب دەنگەکێ نەرم گۆتێ

— ئەرێ گەلەکا باشن، بەش ئەڤرۆ خرێ نەنڤستیوە، لەوڕا دێ چم و کەڤم.

ڕزگاری ژی تەلەفۆن نیشا دا، تبل خوە ل نیشانا مایکێدا و بێدەنگکر

— پا تو هەرە تاکو سوبەهی دئاخڤین

هێڤییێ گرنژینەک دایێ و چوو.

ژوورا خوە تاری کر، هەروەکی تایەکێ لێڤێن وێ گرتیین یا درەجفیت، نەڤێت دەرکەڤیت و کەس ب ڤی سەر و بەری ببینیت. دەستیێن خوە دانە ڕانێن خوە و ڤەمالین، پاشی پشتا خوە گڤاشت، ژان هاتنێ هەروەکی بیکەکا شەرمین د شەڤا خوەیا ئێکێدا، دڤیا ڕابیت پێی وێ خوە نەدانە بەر، گەلەک ترسیا، ژ وێ ترسێ ڕابوو سەر خوە و گلۆپا ژوورا خوە هەلکر. پێی وێ ب زۆری یێ خوە ددەنە بەر، دەرگەهێ ژوورێ ڤەکر و بەرەڤ دەستشۆیێ چوو. دەرگەهێ تەوالێتێ ڤەکر تەرەکسۆتێ خوە ئینا خوار، هندی هاتێ نەشیا خوە بچەمینیت. چپکەکا خوینێ کەفتە سەر وی چارچوڤێ سپی یێ تەوالێتێ! چاڤێن وێ زیک بوون، دەستێ خوە برە پێسیرا خوە، باش تێڤەدا و بەرێ خوە دایێ چ نەما ب دەستێ وێڤە. پاشی دەستێ خوە برە ڕانێن خوە و د ناڤ ڕا بر و ئینا، بەرێ خوە دایێ خوین یا ب تبلێن وێڤە. د وان دەلیڤەیاندا ترسێ وەلێکر ئێکسەر خوە چەهاند و زوی خوە شویشت. جهێ خوە باش پاقژکر و دەرکەڤت. د خۆدیکا دەستشۆیێدا بەرێ خوەدا دێوێ خوە، پاشی ئەزمانێ خوە ل لێڤێن خوەدا. چاڤێن خوە باش شویشتن و پیچەک سەرێ خوە تەرکر و هات داکو بچیتە ژوورا خوە، بەری دەرگەهێ ژوورا خوە ڤەکەت، بەرێ خوەدا بابێ خوە، جگارا وی یا د ناڤ لێڤان ڕا و ئەلبۆمەکا د دەستاندا یێ بەرێ خوە ددەتە وێنەیان. بابێ وێ زڤڕی بەرێ خوە دایێ

— هێڤی، وەرە بابۆ وەرە، وەرە بەرێ خوە بدە من بەری ئەز بکەڤم، دەمێ ئەزێ گەنج و ل سەرخوە، تو بەش وەرە بەرێ خوە بدە بڕنۆیا من

هێڤی هێدی چوو ب ڕەخڤە ڕووینست دگەل وی بەرێ خوە دایێ

— بەرێ خوە بدەیێ، ئەڤە ئەز و مامهێ تەو و هندەک گۆندیێن هەنە، ڤی دەمی ئەم هند د چیای ڕا ئاسێ بوویین، هە نە دشیا زوی ب زوی ژ شکەفتان دەرکەڤین.

بەرپەرێ ئەلبۆمێ ڤەدا..

— ئەڤە ئەم کۆمەکا پێشمەرگەیانە، ئەم هاتبوویینە گۆندەکی هندەک نانی بۆ پێشمەرگەیان

بەرپەرەکێ دی ڤەدا..

— ئەڤە مامهێ تەیە. ئەوێ دی خالدی ڕەحمەتییە. یێ دی سەلیوێ نوکە یێ ل سوێدێ، ئەڤێ هە یێ دوماهییێ نەما فەقیری ئەلغام پێڤە پەقی

لاپەرێدی ڤەدا ئاخینەک ڕاهێلا

— هێ هێ مالا دونیایێ، ل ڤێرێ ژ نووی من دایکا تە خواست بوو. ئەڤە سەلیوێ زەلامێ بەسنایێیە، ئەڤا دایکا تە جار جارا دچیت و سەرا ددەت نوکە نەما. ئەڤێ هە لادویێ گەوادێ بەعسیایە، نزانم نوکە ل کویڤەیە؟

د وان دەلیڤەیاندا جلفەک ب هێڤییێ کەت، دا بەر پەری لۆلپینیت هێڤییێ دەستێ خوە دانا سەر .

— باب ئەڤە کییە؟
— کیژک ئەڤێ خودانێ سوبێلا ؟
— ئەرێ ئەڤێ تە گۆتی ئەز نزانم نوکە ل کویڤەیە؟

بابێ وێ ئاخینەک ڕاهێلا ..

— بابۆ ئەڤە گەوادێ بەعسیان بوو، دهاتە ناڤ گۆندان ل کچ و ژنێن خەلکی دگەڕیا و دەستنیشان دکر و زۆری ژی دکر. هندی سەرشۆر بوو، دوو جارا سەلیوی ل بەر ڤەدا دا کوژیت، بەش ژبەر ژنکا خوە نەدشیا.

هێڤییێ دڤیا هێشتا بەحسا وی بکەت

— تو نزانی نوکە چ لێ هاتییە؟
— نە، هاتە تەلافتن یان نە نزانم! بەش وەکی من زانی مابوو، ڤێجا ل ڤێرێیە ژدەرڤەیە، ئەرێ ب خودێ بابۆ ئەڤە ژ وان بەعسیان خرابتربوو و خەلک پتر ژ ڤی ترسیا، هە دگۆتێ لادویێ لویندەهـ!

هێڤی هشک مابوو، چاڤێن خوە پەرخاندن

— باب ناڤێ بابێ وی ل بیرا تەیە ؟

بابێ وێ دەستێ خوە ئێخستە ئەرزنکا خوە و پیچەک ما..

— ناڤێ بابێ وی ناهێتە بیرا من، بەش دوو برا هەبوون، شەوکەت و شاکر

چاڤێن هێڤییێ تژی بوون. بابێ وێ زڤڕی، بەرێ خوە دایێ و هەر زوی هێڤییێ باوەشکا خوە ئینا، گرنژ

— هەرە بابۆ تو ئەڤرۆ گەلەکا وەستیای.. هەرە بنڤە.

هێڤی ڕابوو چوو ژوورا خوە، ب لەز تەلەفۆنا خوە ڤەکر و برە سەر ناڤێ وی، ڕێڤەبەر لادر! گلۆپا ژوورا خوە گرت. خوە درێژ کر سەر جهێ خوە و تەلەفۆنا خوە ژی ڤەمراند. ژوور ب تەمامی تاری بوو، د وێ تاری و بێدەنگیێدا ب تنێ دەنگێ هەناسە و گرییەکا ڕەحەت دهات.

ئەلبۆم

چیرۆک

ئەلبۆم

نووسینی: عادل عەبدولمەجید یووسف

Koment (0)