مۆسیقا، هەر تشت ژ بیرا من دبت
تنێ چاڤێن تە تێنە.
دارکێ هارێ کەمانێ
ب سەرخوەشی ل سەر بیبیکێن چاڤێن تە
دلێزت
ئاواز دژێن و تۆ ژ دوورڤە
دەستێ خوە بلند دکی و
دبێژی:
دینۆ نە خەندقە!!

ئەز دێ پرچا تە یا ل بەر
لێڤا بای
بەردای ب سێ تلیێن خوە بادم
تو دێ ل خوە زڤری و
ناڤتەنگا تە دێ د دەستێن من دا خاڤ بت
لێڤێن من یێن ئەز نەشێمێ
دێ گەردەنا تە عالیسن

ببۆڕە خانم
دینم ئەز و ل بەر پێلێن دەریایێ
دینتر دبم دەمێ تە د کراسێ کەسکێ
ب سێڤان ڕەشاندی
دبینم.

نۆ، نۆ، نۆ
چاڤێن خوە یێن پلنگی
ل من نەئارهێنە
ببینە چەند بایەکێ هێنە
ل سەر لێڤێن شەڕابێ، وێنێ خوە ل سەر گرتی.

دینم جانێ
تو خودێ کی
های ژ من هەبە

دێ هێم، بەلێ دێ هێم
دزانم چاڤێن تە ل هیڤیا هاتنا بەهارێنە.

دێ هێم ، بەلێ دێ هێم و
ل بن کەفشێ تە یێ
ب دەزیێ زڕاڤێ ڕەشێ شەڤێ
یێ تو هندە شەڤا پێ دخوری
دێ ب چەند گەزا، ئیمزا خوە، ل سەر چێکەم .

ئەو سیها ل بن خوها ئەتەکێ نوو
چەند خۆشە!!
ماچییە هەکە هندی خەونەکێ تنێ
ل بن بێهنێ ڤەدم؟؟

دزانم
ئالەکێن تە یێن هێژیری
نەشێن خوە ل بەر موویێن سمبێلێن من بگرن.

چو نینە جان
هێدی، هێدی، دێ فێر بی
دێ خەریب بی.

دخوێنم خانم خەونێن تە
دخوێنی خانم خەونێن من
ئێکین ئەم
ئەوە مە ئێکدو نەدیتی.