ڕۆندکێن ئەوران

ڕۆندکێن ئەوران

نە ب تەنێ ئاڤن،
ئەو نامەیێن ئەسمانی نە
بۆ ئەردێ تێهنی...،
هەر دلۆپەک
چیرۆکەکێ دگەل خو دئینیت
دکەڤیتە سەر لێڤێن سیڤاندەیێن شکەستی
گەهــ و شادەمارێن شادیێ د بڕیت...،

د ناڤ ستریێن ژیانێ دا
ئەم بایێ ڕۆژێن گەرم د هەلمژین
هیڤی.. د بەریکا ڤێ دۆزەخێ دا
د بەرزە نە..
سەما و دیلان و گڕنژین د بێزار و شەپرزەنە!

دەما ئەسمان دگریت .. ئەرد شینی و زێماران د گێڕیت
دەنگێ گوهدانا چپکێن بارانێ
بیرا ئاخێ ل هەوارێن بن دەستیێ د ئینیت
هەناسا ژیانێ
د ناڤ دەستێن ستەمێ دا چک دبیت

بەلێ هیڤیەک ژ هەبوونێ و بێدەنگیەک ژ ڕابوونێ
ڕۆندکێن ڤان ئەوران ببنە شاهیێن ئەسمانی
ئەڤی ئەردی ژ خەما بشۆت
دا ئارام و تەنا بنڤیت