ل بن سێبەرا چیایەکێ بلند و بەرز، ل جھەکێ کو ب بتنێ دەنگێ بای و داروباران دهات، خانویەکێ بچووک یێ داری هەبوو. ل ڤێ مالێ زەلامەکێ دانعەمر دژیا کو خەڵکی ب "نڤیسەر"د نیاسی، چونکی تەمەنێ خۆ هەمی د ناڤ پەرتووک، نڤێسین، ڕامان و تێپەڕبوونا ساڵان دا دەرباز کربوو. خەلکێ ل دەوروبەران ژیانا وی ب سەیری ددیت، چونکی ژ داڕەکێ ئێستیر و مەزن دەرگەهەك بو مالا خۆ چێکر بوو، بەلێ ئەو دەرگەهە چ جارێن هەی نەدهاتە گرتن، و شەڤ و ڕۆژ ب ڤەکری دما.

ڕۆژەکێ ژ ڕۆژان، گەنجەک کو ژ بەر وەستیانا سەر ڕێکا ژیانێ و بارێ گران یێ هزڕان ماندی ببوو، ل بەر دەرگەهێ وێ مالێ ڕاوەستا. گەنجی زۆربەی ژیانا خۆ ب لیگەڕیانا ئارامیێ دەرباز کربوو، بەلێ هەر جهەکێ چۆبایێ، هەست ب بەربەست و زنجیرێن نەدیار دکر، دەمێ گەهشتییە سەرێ چیایی و گەهشتییە بەر وێ مالێ، ل شوونا کو راستەوخۆ بچێتە ژوور، بۆ دەمەکێ درێژ ل بەر دەستکێ دەرگەهی ڕاوەستا و دوو دل بوو. د دوودلیێ دا بوو و هزر دکر کا دێ چەوا چیتە ژوور ب بێی کو کلیلەک د دەستدا بیت یان مۆلەتەکا تایبەت وەرگریت،

د ناڤەڕاستا ڤێ دوودلیێ دا، ژ ناڤ مالێ، دەنگەکێ ئارام و هێمن هات:

«بۆچی تۆ ل بەر دەرگەهەکێ ڤەکری ڕاوەستیایە؟ لێبدە و وەرە ژوور!»

گەنجی ب ئازایەتی پێنگاڤەک هاڤێت و چوو د ژوورڤە. دیت نڤیسەر ل بەر گەرماتیا ئاگرەکێ ئارام ڕوونشتییە، پەرتووکەک ل بەر سینگێ وی یە و پەیالەکا چایێ د دەستاندایە. ل هەمی لایێن ژوورێ، پەرتووک و پارچێن کاغەزان هاتبوونە ڕێزکرن، کو دیار بوو نڤیسەری هەمی بەرسڤێن خۆ تێدا تۆمار کربوون.

گەنجی ب سەرسۆڕمانی ڤە پرسیار کر، ئەز هاتمە ڤێرێ دا کو بگەڕیێم ل بەرسڤا وێ چەندێ کا بۆچی ژیان ئەڤقاس یا گرانە و ئارامی ب ساناهی ناهێتە دیتن. بەلێ پێشیا ئەز پرسیارا خۆ بکەم، بێژە من مامێ نڤیسەر، بۆچی تە دەرگەهێ مالا خۆ ب ڤێ مەزناهیی چێکرییە، بەلێ تە چ قفل لێ نەداینە؟ تۆ ژ دزان و زیانگەهاندنێ ناترسی؟

نڤیسەری ب کەنییا خۆ یا هێمن بەرێ خۆ دا وی، پەرتووکا دەستێ خۆ دانا سەر مێزا داری و گۆت: دز تشتێن دەستکرد د دزن، تشتێن کو دهێنە کڕین و فرۆشتن. بەلێ ئارامیا دلی، ئازادی و ڕاستی ناهێنە دزین. ئەڤ دەرگەهە نە بۆ هێلانا خەڵکی ل دەرڤەیە، بەلێ بۆ وێ چەندێ یە کو ئەز بزانم کێ حەز هەیە ب ئازادی و ب بڕیارا خۆ بێتە ژوور.

نڤیسەری دەستێ گەنجی گرت و برە بەر پەنجەرەکا مەزن، کو تێدا دۆل و نهال چیا دهاتنە دیتن، و پاشان کوورتر ئاخڤت: زۆربەی مرۆڤان ژیانا خۆ ب دەستێن خۆ دکەنە زیندان. ئەو دەرگەهێن دل و هزرا خۆ ب قفلێن ترسێ، حەسیدیێ و خەمێن بەرێ قفل دکەن، پاشان ژی گازی دکەن و دبێژن ژیان تاڕی بوو و رێکا بەختەوەریێ بەرزە بوو! مەزنترین بەربەست ل پێشیا مرۆڤی نە ئەو دیوارن ئەوێن ل دەورۆبەرێن وی، بەلێ ئەو قفلێن نەدیارن ئەوێن مرۆڤی بخۆ ل سەر هزرا خۆ داناین. دەمێ تۆ ل بەر دەرگەهێ مالا من ڕاوەستیایی، تە هزر دکر کو دەرگەهـ قفلکرییە بتنێ ژ بەر کو تە ژ دەرڤە بەرێ خۆ ددایێ. ب هەمان شێوە، ئازادی د دەرڤەی تە دا نینە، بەلێ د ناڤبەرا تە و هزڕێن تە دا یە.

پاشان نڤیسەری لاپەڕەکێ سپی ژ سەر مێزێ ڕاکر و نیشا وی گەنجی دا و گوتێ: سەحکە ڤی لاپەڕەیێ سپی. ئەگەر ئەز تشتەکێ ڕەش ل سەر بنڤێسم، لاپەڕە تاوانبار نینە، بەلێ پێنووس و دەستێ من بەرپرسیارن. ژیانا تە ژی وەک ڤی لاپەڕەیی یە؛ خەم، ترس و قفلێن تە، ئەو نڤێسینن ئه‌وێن تە بخۆ ب هزڕێن خۆ ل سەر ژیانا خۆ کێشاین. ئەگەر تە بڤێت ژیانەکا نوو دەستپێبکەی، فەرە بڕیارێ بدەی کو وێ قفلا نەدیار ژ سەر دلێ خۆ ڕاکەی.

پاشان نڤیسەری پارچەکا داری دانا ناڤ ئاگری و بەردەوام بوو: سەحکە ڤی ئاگری؛ ئەگەر دار د ناڤ دا نەبیت، ئاگر نامینیت. خەم و ترسێن تە ژی وەکی ڤی ئاگرینە، ئەگەر تۆ بخۆ دار و سووتەمەنیێ بۆ نەبەیی ب ڕێکا هزرکرنا زێدە، ئە بخۆ دێ ڤەمرن.